Ministri për Evropën dhe Punët e Jashtme i Shqipërisë, Ferit Hoxha, i është përgjigjur deklaratave të presidentit serb Aleksandër Vuçiç, duke theksuar se bashkëpunimi mes Shqipërisë, Kosovës dhe Kroacisë nuk duhet të përdoret si arsye për rritjen e tensioneve apo militarizimin e rajonit.
Reagimi i Hoxhës erdhi pas deklaratave të Vuçiçit, i cili gjatë një ceremonie të Forcave të Armatosura serbe pretendoi se Shqipëria, Kosova dhe Kroacia kanë krijuar një aleancë kundër Serbisë dhe paralajmëroi, sipas tij, “ditë të vështira” për vendin.
“Çdo angazhim i yni, koordinim dypalësh, tripalësh apo shumëpalësh nuk duhet të shqetësojë askënd dhe as të përdoret nga askush, në rajon apo jashtë tij, për të justifikuar militarizimin e vendit e të shoqërisë, e aq më pak për t’i fryrë zjarreve të rrezikshme të luftës apo për të rikthyer thirrje të vjetra për fitore dhe pretendime territoriale”, deklaroi Hoxha.
Thirrje për bashkëpunim dhe integrim evropian
Kryediplomati shqiptar theksoi se përpjekjet për të rikthyer ndasitë e së kaluarës nuk i shërbejnë stabilitetit të Ballkanit dhe nuk duhet të pengojnë rrugën evropiane të vendeve të rajonit.
“Askush nuk mund ta tërheqë rajonin pas në kohë duke ushqyer tensione apo duke penguar proceset e pajtimit dhe bashkëpunimit. E ardhmja jonë e përbashkët mbetet integrimi evropian”, u shpreh ai.
Grliç-Radman: Shqipëria po avancon drejt BE-së
Gjatë takimit me homologun shqiptar, ministri i Jashtëm i Kroacisë, Gordan Grliç-Radman, vlerësoi progresin e Shqipërisë në procesin e integrimit evropian.
Ai theksoi se Shqipëria po ecën përpara drejt anëtarësimit në Bashkimin Evropian, falë reformave dhe meritave të saj, duke rikonfirmuar mbështetjen e Zagrebit për këtë proces.
Marrëveshja e vitit 2025 në qendër të debatit
Marrëveshja e bashkëpunimit në fushën e mbrojtjes ndërmjet Shqipërisë, Kosovës dhe Kroacisë, e nënshkruar në mars të vitit 2025, ka qenë vazhdimisht objekt kritikash nga Beogradi. Autoritetet serbe e kanë cilësuar atë si një aleancë të drejtuar kundër Serbisë dhe e kanë përdorur si argument për forcimin e kapaciteteve të tyre ushtarake.
Nga ana tjetër, Tirana dhe Zagrebi kanë ritheksuar se bashkëpunimi mes vendeve partnere synon forcimin e sigurisë, stabilitetit dhe bashkëpunimit rajonal, në përputhje me standardet euroatlantike.
