Deputetja e LDK-së, Hykmete Bajrami, ka reaguar pas miratimit të ligjit për ndarjet buxhetore për vitin 2026 në Kuvendin e Kosovës, duke e kritikuar ashpër mënyrën e hartimit dhe përmbajtjen e tij.
Sipas saj, megjithëse LVV është në pushtet që nga viti 2021 dhe ka qenë në dijeni për rezultatin e zgjedhjeve që nga 28 dhjetori 2025, ligji i miratuar sot nuk pasqyron as strukturën aktuale të Qeverisë.
“4 nga 19 ministra mbeten pa buxhet me ligjin që kaloi sot”, ka shkruar Bajrami, duke e cilësuar këtë si tregues të mungesës së seriozitetit në planifikimin buxhetor.
Ajo ka akuzuar Qeverinë për keqmenaxhim të parasë publike gjatë pesë viteve të fundit, duke përmendur, sipas saj, mbi 3500 kontrata me negocim të drejtpërdrejtë dhe skema korruptive publike, pa projekte kapitale me vlerë afatgjatë për vendin.
Si shembull, Bajrami ka përmendur rrugët rajonale që, sipas saj, prej gjashtë vitesh mbeten në gjendje punishtesh të pezulluara.
Deputetja e LDK-së ka kritikuar gjithashtu politikën e shpërndarjes së mjeteve buxhetore, duke thënë se ato shpesh rrisin importin dhe thellojnë deficitin tregtar. Sipas saj, shteti është kthyer në mekanizëm që mbledh para nga qytetarët përmes inflacionit dhe më pas shpërndan ndihma të vogla për të mbuluar, siç tha ajo, dështimet në arsim, shëndetësi dhe fusha të tjera.
Në fund, Bajrami theksoi se vota nuk duhet të jetë qëllim në vetvete, por mjet për realizimin e programit dhe përmirësimin e jetës së qytetarëve, duke shtuar se, sipas saj, kjo nuk po reflektohet në qasjen e LVV-së ndaj qeverisjes.
