Deputetja e LDK-së, Hykmete N. Bajrami, ka kritikuar kryeministrin Albin Kurti lidhur me procesin e zgjedhjes së presidentit të Kosovës, duke thënë se takimet me liderët e opozitës po zhvillohen pa ndonjë propozim konkret.
Sipas saj, Kurti ka zhvilluar takime me kryetarin e Lidhja Demokratike e Kosovës dhe atë të Partia Demokratike e Kosovës pa paraqitur asnjë emër apo propozim për president.
Bajrami theksoi se partia në pushtet, Lëvizja Vetëvendosje, së bashku me përfaqësuesit e komuniteteve joshumicë ka 66 vota në Kuvend dhe, sipas saj, mban përgjegjësinë kryesore për zgjedhjen e presidentit.
Ajo tha se kishte dy rrugë të mundshme për ta zgjidhur situatën: përfshirja e një partie tjetër në qeveri për të siguruar votat e nevojshme ose propozimi i një kandidati apartiak që mund të mbështetej më gjerë në Kuvend.
“Kurti nuk e bëri as njërën dhe as tjetrën”, ka deklaruar Bajrami, duke paralajmëruar se tentativa për zgjedhjen e presidentit përmes presioneve politike mund të dështojë.
Deputetja e LDK-së shtoi se nëse vendi shkon në zgjedhje të reja, Kosova rrezikon të mbetet për muaj të tërë pa institucione funksionale dhe me kosto të mëdha financiare për qytetarët.
Në reagimin e saj, ajo u bëri thirrje qytetarëve që të vëzhgojnë sjelljen politike të kryeministrit, duke theksuar se vendi nuk duhet të mbetet “peng i dy apo tre emrave për president” dhe se në Kosovë ka figura me integritet edhe jashtë partive politike që mund ta ushtrojnë këtë detyrë.
