Ambasadori i SHBA-së në OKB, Mike Waltz, ka deklaruar se presidenti amerikan Donald Trump po i lë hapësirë diplomacisë me Iranin, ndërsa për natën e dytë radhazi nuk janë raportuar sulme ushtarake në rajon.
Në një intervistë për NBC News, Waltz tha se administrata amerikane po zhvillon negociata me Teheranin në nivele të ndryshme, por theksoi se të gjitha opsionet mbeten ende të hapura.
“Presidenti po i mban të gjitha opsionet në tryezë”, deklaroi Waltz.
Ai shtoi se udhëheqja iraniane duhet t’i marrë seriozisht paralajmërimet e presidentit Trump. I pyetur nëse Uashingtoni ka vendosur të mos e përshkallëzojë situatën, Waltz u përgjigj se nuk do të shkonte “aq larg” me një vlerësim të tillë.
Sipas tij, forcat amerikane mbeten në gatishmëri të plotë, ndërsa SHBA-ja ka dislokuar mjete shtesë ushtarake në rajon për t’iu përgjigjur çdo kërcënimi ndaj lundrimit ndërkombëtar.
Ndërkohë, sipas raportimeve të agjencisë Anadolu, gjatë natës deri të dielën nuk janë regjistruar sulme ajrore amerikane ndaj Iranit apo shpërthime të reja, duke shënuar natën e dytë radhazi me qetësi relative.
Kjo periudhë pa sulme vjen pas memorandumit të mirëkuptimit të nënshkruar në muajin qershor mes Uashingtonit dhe Teheranit, me ndërmjetësimin e Katarit dhe Pakistanit. Marrëveshja parashikoi një armëpushim dhe krijoi bazën për vazhdimin e negociatave me synimin për arritjen e një marrëveshjeje përfundimtare që do t’i jepte fund tensioneve mes dy vendeve.
