Ushtria izraelite (IDF) ka shpallur të dielën “pauza taktike” në tri zona të Rripit të Gazës, me qëllim të lehtësimit të shpërndarjes së ndihmave humanitare për civilët palestinezë që përballen me një krizë të thellë urie. Masat e reja përfshijnë krijimin e korridoreve të sigurisë dhe ndërprerje të përkohshme të operacioneve ushtarake nga ora 10:00 deri në 20:00 në zonat Muwasi, Deir al-Balah dhe Gaza City.
Në një deklaratë zyrtare të shpërndarë në rrjetin Telegram, IDF bëri të ditur se, sipas udhëzimeve të ekzekutivit, janë kryer edhe hedhje ajrore të ndihmave, në kuadër të përpjekjeve për të përshpejtuar dërgimin e ndihmave tek civilët në nevojë të thellë.
Në të njëjtën kohë, mediat egjiptiane kanë konfirmuar nisjen e kamionëve me ndihma humanitare nga Egjipti drejt Rripit të Gazës, përmes pikës kufitare Rafah. Pamje të transmetuara nga terreni tregojnë autokolona të shumta duke hyrë në territorin palestinez.
Izraeli ka njoftuar gjithashtu se do të lejojë qarkullimin e sigurt të mjeteve të Kombeve të Bashkuara dhe organizatave të tjera humanitare, duke krijuar “korridore humanitare” në zonat më të prekura nga lufta. Megjithëse IDF ka mohuar raportimet për një uri masive në Gaza, organizatat ndërkombëtare kanë ngritur alarmin për rrezikun e kolapsit humanitar, për shkak të mungesës së ushqimit, ujit dhe ndihmës mjekësore.
Kjo lëvizje e re e autoriteteve izraelite shihet si një përpjekje për të menaxhuar presionin ndërkombëtar dhe për të shmangur përshkallëzimin e krizës humanitare në rajon, ndërsa luftimet vazhdojnë në pjesë të tjera të territorit palestinez.
