Ish-kryetari i Kuvendit të Kosovës, Jakup Krasniqi, ka ardhur sot nga Haga në Kosovë, pasi ka marrë leje nga Gjykata Speciale për një vizitë për arsye të forta humanitare. Sipas raportimeve, vizita lidhet me gjendjen shëndetësore të bashkëshortes së tij.
Zëdhënësi i Dhomave të Specializuara të Kosovës në Hagë, Michael Doyle, ka konfirmuar për IndeksOnline se leja është miratuar nga trupi gjykues për arsye humanitare.
Ai ka shpjeguar se kërkesa është trajtuar në mënyrë urgjente nga gjyqtarët, duke u bazuar në rregullat e gjykatës dhe në të drejtën ndërkombëtare për të drejtat e njeriut.
“Për momentin, e vetmja gjë që mund të them është se kjo erdhi si pasojë e arsyeve të forta humanitare. Pala e akuzuar mund të paraqesë një kërkesë të tillë dhe më pas gjyqtarët, duke u mbështetur në rregullat e gjykatës si dhe në të drejtën ndërkombëtare të të drejtave të njeriut, marrin një vendim me urgjencë dhe profesionalizëm”, ka deklaruar Doyle.
Nuk bëhet i ditur kohëzgjatja e vizitës
I pyetur se për sa ditë i është lejuar Krasniqit të qëndrojë në Kosovë, Doyle nuk ka dhënë detaje, duke thënë se informacione të tjera mund të publikohen më vonë përmes dokumenteve gjyqësore.
“Siç ka ndodhur edhe në të kaluarën, pasi të jenë kryer vizitat, mund të bëhen publike më shumë informacione, përfshirë ato në dokumentet gjyqësore. Për momentin, nuk jam në gjendje të jap detaje të tilla operative”, ka thënë ai.
Krasniqi ishte për herë të fundit në Kosovë në tetor të vitit 2024.
Ai është dënuar me 25 vjet burgim nga Dhomat e Specializuara të Kosovës në Hagë, me aktgjykimin e shpallur më 16 shtator 2026.

