Prokurori special Jack Smith, i ngarkuar me hetimin e çështjeve kundër ish-presidentit Donald Trump, ka dhënë dorëheqjen nga Departamenti i Drejtësisë. Largimi i tij vjen pasi ai përfundoi raportin përfundimtar dhe mbylli angazhimin e tij në këtë rast, njoftuan burime ndërkombëtare të lajmeve.
Smith, i cili ngriti akuza kundër Trump për përpjekjen për të minuar rezultatet e zgjedhjeve presidenciale të vitit 2020 dhe për vjedhjen e dokumenteve konfidenciale nga Shtëpia e Bardhë pas përfundimit të mandatit të tij, argumentoi se nuk mund të vazhdonte procedurat ligjore kundër një presidenti në detyrë. Vendimi i tij u mbështet nga politika e Departamentit të Drejtësisë, e cila ndalon ndjekjen penale të presidentit aktual.
Në një deklaratë të bërë pas fitores së Trump në zgjedhjet presidenciale të vitit të kaluar, Smith sqaroi se pas konsultimeve me kolegët e tij, ai arriti në përfundimin se ndjekja penale e Trump nuk ishte e mundur në përputhje me rregullat ekzistuese. Për këtë arsye, ai dorëzoi një dosje gjyqësore që përmbante vendimin për të mos vazhduar procedurat ligjore. Megjithatë, mbetet e hapur çështja nëse proceset gjyqësore do të rinisin pas përfundimit të mandatit presidencial të Trump, i cili pritet të fillojë detyrën më 20 janar.
Trump: Akuza dhe kritika ndaj prokurorit special
Gjatë fushatës zgjedhore, Trump e kritikoi vazhdimisht Smithin, duke e akuzuar për paragjykime dhe për një “gjueti shtrigash” politike. Në një postim në rrjetet sociale të shtunën, Trump deklaroi se Smith ishte “shkarkuar” dhe e përshkroi atë si një “turp për veten, familjen dhe vendin e tij.”
“Pas shpenzimeve prej mbi 100 milionë dollarësh për të më ndjekur pa asnjë arsye, ai u largua nga qyteti duarbosh!” – shkroi Trump në postimin e tij.
Çështja e ngritur nga Jack Smith ka qenë një nga hetimet më të rëndësishme ndaj një ish-presidenti në historinë e fundit të SHBA-së, dhe largimi i tij ngre pyetje për të ardhmen e këtyre proceseve ligjore.
