Departamenti Amerikan i Shtetit ka dërguar në mesin e muajit qershor një kabllogram për më shumë se 20 ambasada amerikane, nga Argjentina dhe Meksika deri në Itali dhe Shqipëri, ku kërkohet informacion mbi grupet ekstremiste të krahut të majtë.
Sipas raportimit të gazetës amerikane The Washington Post, disa ambasada kanë kthyer përgjigje ndaj kërkesës së Departamentit të Shtetit, por asnjëra prej tyre nuk ka deklaruar se pajtohet plotësisht me vlerësimin e administratës amerikane për nivelin e kërcënimit.
Megjithatë, administrata e presidentit Donald Trump e sheh këtë çështje ndryshe. Sekretari amerikan i Shtetit, Marco Rubio, ka ftuar ministra të lartë nga më shumë se 60 vende në një takim të planifikuar për javën e ardhshme, ku pritet të diskutohet fenomeni që Uashingtoni e përshkruan si “rikthimin e terrorizmit transnacional të ekstremit të majtë”.
Shqetësime nga zyrtarë amerikanë dhe aleatë evropianë
Takimi ka shkaktuar reagime dhe shqetësime mes disa zyrtarëve aktualë dhe ish-zyrtarëve amerikanë, aleatëve evropianë dhe analistëve të pavarur, të cilët nuk ndajnë të njëjtin vlerësim për nivelin e kërcënimit.
Disa zyrtarë amerikanë, të cituar nga The Washington Post, kanë shprehur shqetësimin se administrata Trump mund të përdorë mekanizmat e fuqishëm të kundërterrorizmit edhe ndaj aktivistëve amerikanë që ajo i konsideron pjesë të ekstremit të majtë.
Zëdhënësi i Departamentit të Shtetit, Tommy Pigott, ka deklaruar se takimi është organizuar për shkak se terrorizmi i ekstremit të majtë është “një kërcënim i vjetër që po rikthehet me lidhje të forta transnacionale dhe forma të reja bashkëpunimi”.
“Për shkak se ky kërcënim nuk është trajtuar siç duhet në të kaluarën, çdo angazhim, deklaratë apo program sigurie krijon një efekt të shumëfishtë që ndihmon në forcimin e masave kundër këtij fenomeni, si brenda vendit ashtu edhe jashtë tij”, është shprehur Pigott.
Debati për Antifën
Në disa takime të zyrtarëve të sigurisë kombëtare amerikane, analistë të inteligjencës kanë refuzuar të hartojnë raporte të veçanta për Antifën, pasi sipas tyre nuk e konsiderojnë atë një kërcënim serioz në kuadër të kundërterrorizmit.
Antifa, shkurtim për “antifashist”, përshkruhet si një lëvizje e decentralizuar pa strukturë të qartë udhëheqëse apo komandimi. Ajo përfshin një spektër të gjerë grupimesh dhe bindjesh politike, kryesisht të majta, nga anarkizmi deri te komunizmi.
Ndryshe nga organizatat ekstremiste të majta të dekadave 1960 dhe 1970, Antifa nuk ka një strukturë të centralizuar, nuk publikon manifeste dhe zakonisht nuk merr përgjegjësi për veprimet e kryera.
Reagime skeptike nga disa vende evropiane
Disa qeveri të huaja kanë shprehur habi për ftesën e Sekretarit Rubio. Zyrtarë evropianë, në kushte anonimiteti, kanë kritikuar mungesën e qartësisë mbi objektivin e takimit dhe kohën e shkurtër për organizimin e tij.
Ftesat janë dërguar javën e kaluar, ndërsa vendet e ftuara janë kërkuar të japin përgjigje deri të premten.
Disa diplomatë kanë bërë të ditur se ministrat e Jashtëm apo të Brendshëm të vendeve të tyre nuk pritet të marrin pjesë për shkak të angazhimeve të shumta diplomatike gjatë sezonit veror.
“Ne nuk kemi Antifa”, ka deklaruar një diplomat evropian, duke shprehur habi për arsyen e përfshirjes së vendit të tij në këtë takim.
Një tjetër diplomat është shprehur: “Nuk gjejmë asnjë arsye pse do të na interesonte të merrnim pjesë në një takim të tillë”.
Ndërsa një diplomat i tretë ka deklaruar se autoritetet e zbatimit të ligjit në vendin e tij nuk e konsiderojnë terrorizmin e ekstremit të majtë si një kërcënim me përparësi.
Shqipëria në listën e vendeve të kontaktuara
Lista e vendeve të ftuara, sipas dokumenteve të shqyrtuara nga The Washington Post, përfshin shumicën e shteteve evropiane, vendet kryesore të Amerikës Latine si dhe disa shtete aziatike, përfshirë Indinë, Indonezinë dhe Singaporin.
Departamenti Amerikan i Shtetit nuk ka dhënë sqarime mbi kriteret e përdorura për përzgjedhjen e vendeve të përfshira në këtë iniciativë.
