Përfaqësuesja e lartë e Bashkimit Evropian për politikën e jashtme, Kaja Kallas, ka paralajmëruar se Evropa nuk duhet të vendoset në një pozitë dobësie përballë Rusia, duke theksuar se dialogu nuk mund të kërkohet me çdo kusht.
Duke folur pas një takimi ministror nordik-baltik, ajo u shpreh se Moska po zvarrit qëllimisht procesin e negociatave për luftën në Ukrainë.
“Nuk duhet ta poshtërojmë veten duke qenë kërkues – si të lutemi që të flasin me ne. Rusia nuk po angazhohet realisht në dialog”, deklaroi Kallas.
Sipas saj, strategjia e BE-së duhet të jetë e qartë: të detyrojë Rusinë të kalojë nga pretendimet për negociata në negociata të vërteta.
Paralajmërimet e saj vijnë në një moment kur Bashkimi Evropian ka rritur ndjeshëm presionin ndaj Moskës. Liderët evropianë kanë miratuar një paketë të re sanksionesh dhe kanë zhbllokuar një kredi prej 90 miliardë eurosh për Ukraina, në mbështetje të luftës së saj kundër agresionit rus.
Ndërkohë, Kallas theksoi se Rusia po përgatitet për një përballje afatgjatë me Perëndimin, duke paralajmëruar se çdo shenjë dobësie vetëm sa e inkurajon agresionin.
Kjo situatë vjen në një klimë të tensionuar gjeopolitike, sidomos pas deklaratave të fundit të Donald Trump për mundësinë e tërheqjes së trupave amerikane nga Evropa, çka ka shtuar shqetësimet për sigurinë e kontinentit.
Në këtë kontekst, vendet e BE-së po përshpejtojnë investimet në mbrojtje, përfshirë programe të reja financimi që mund të arrijnë deri në 800 miliardë euro.
“Nuk mund të ketë kthim në marrëdhënie normale me Rusinë”, përfundoi Kallas, duke sinjalizuar një qëndrim gjithnjë e më të ashpër të Evropës ndaj Kremlinit.
