Shefja e re e diplomacisë së Bashkimit Evropian, Kaja Kallas, ka deklaruar se Rusia nuk ka asnjë shans kundër NATO-s dhe Bashkimit Evropian, por ka theksuar se suksesi i përballjes me kërcënimin rus varet nga uniteti i aleancës transatlantike.
Duke folur në Parlamentin Evropian në Strasburg, në prag të samitit të NATO-s që do të mbahet në Holandë, Kallas paralajmëroi se rritja e shpenzimeve ushtarake, edhe pse e rëndësishme, nuk mjafton për të frenuar Kremlinin, nëse nuk shoqërohet me një koordinim të ngushtë politik dhe strategjik brenda aleancës.
“Sot, kundër NATO-s dhe BE-së, Rusia s’ka shanse. Por ne duhet të qëndrojmë të bashkuar,” tha Kallas, duke shtuar se ruajtja e unitetit është prioriteti më i madh i takimit të ardhshëm të udhëheqësve të NATO-s.
Shtetet e NATO-s nën presion për rritje të buxhetit të mbrojtjes
Në samitin që do të zhvillohet në Hagë, udhëheqësit e vendeve anëtare të NATO-s pritet të bien dakord për rritjen e buxheteve ushtarake, mes presionit në rritje nga Shtetet e Bashkuara për ndarjen më të barabartë të barrës së mbrojtjes kolektive.
Megjithatë, besimi në përkushtimin amerikan ndaj mbrojtjes së Evropës mbetet një pikë e debatueshme brenda aleancës, sidomos pas zhvillimeve të fundit në samitin e Grupit të Shtatë vendeve më të industrializuara (G7) në Kanada, ku presidenti amerikan, Donald Trump, u largua para përfundimit të takimit dhe nuk arriti një qëndrim të përbashkët për dënimin e Rusisë për agresionin në Ukrainë.
Kallas: Rusia po përgatit një agresion afatgjatë
Kallas paralajmëroi se forcimi i vazhdueshëm ushtarak i Rusisë përbën një kërcënim serioz për sigurinë e Evropës dhe të gjithë komunitetit transatlantik. Ajo tregoi për përmasat e shpenzimeve ushtarake ruse:
“Vitin e kaluar, Rusia shpenzoi më shumë për mbrojtje sesa të gjitha shtetet e BE-së së bashku. Këtë vit, po shpenzon më shumë për ushtri sesa për shëndetësi, arsim dhe politika sociale të marra së bashku.”
Sipas saj, këto shifra tregojnë një qasje të planifikuar afatgjatë për agresion ushtarak.
BE-ja reagon me rritje të mbështetjes për industrinë e mbrojtjes
Në përgjigje ndaj kërcënimeve të reja, Brukseli ka publikuar planet për rritjen e prodhimit të industrisë së mbrojtjes në Evropë, në kuadër të një nisme që synon mbledhjen e 800 miliardë eurove për forcimin e kapaciteteve mbrojtëse të shteteve anëtare.
