Kompania për Distribuimin e Energjisë Elektrike në Kosovë (KEDS) ka bërë të ditur se të enjten, më 21 maj 2026, do të realizohen punime të planifikuara për mirëmbajtje dhe siguri të sistemit energjetik, çka do të sjellë ndërprerje të përkohshme të furnizimit me energji elektrike në disa zona të vendit.
Prishtina do të jetë ndër rajonet më të prekura. Ndërprerje do të ketë në zonën e Orllanit nga ora 10:00 deri në 15:30, ndërsa zona e Komunës së Re, përfshirë Doganën, Kazermën “Adem Jashari”, Prronin e Njelmët dhe disa objekte përreth, do të mbesin pa energji nga 09:00 deri në 15:00. Probleme me furnizim do të ketë edhe në një pjesë të Arbërisë së Re.
Në Pejë, ndërprerje të energjisë do të ketë në Junik dhe disa fshatra përreth nga 10:00 deri në 15:30, ndërsa në zonën e Istogut, konkretisht në Vrellë dhe disa lokalitete përreth, ndërprerja është planifikuar nga 14:00 deri në 15:00.
Prizreni dhe Theranda (Suhareka) do të kenë ndërprerjet më të gjera, me një numër të madh lagjesh, fshatrash dhe zonash industriale që do të mbesin pa energji nga 10:00 deri në 16:00, për shkak të mirëmbajtjes së nënstacioneve. Edhe zona e Dragashit do të preket nga ndërprerjet mes 09:00 dhe 14:00.
Në Mitrovicë, konkretisht në rajonin e Skenderajt, fshatrat Syrigan, Runik, Bajë dhe Radishevë do të mbesin pa energji nga 10:00 deri në 15:30.
Në Gjakovë, ndërprerje do të ketë si në disa rrugë të qytetit ashtu edhe në fshatrat përreth, me orare që variojnë nga 08:30 deri në 16:00, varësisht zonës.
Ndërsa në Gjilan, rajoni i Kamenicës dhe disa fshatra si Desivojca, Lisocka, Marovca dhe Velegllava do të mbesin pa energji nga 10:00 deri në 15:30.
KEDS u bën thirrje qytetarëve dhe bizneseve të planifikojnë aktivitetet e tyre sipas orareve të publikuara.
