KEDS ka njoftuar se të shtunën, më 13 qershor 2026, do të realizohen punime për siguri dhe mirëmbajtje të sistemit energjetik, si pasojë e të cilave në disa lokalitete të Kosovës do të ketë ndërprerje të përkohshme të energjisë elektrike.
Sipas njoftimit, ndërprerjet do të prekin rajonet e Prishtinë, Podujevë, Pejë, Prizren, Mitrovicë dhe Gjilan, me orare të ndryshme varësisht nga natyra e punimeve.
Në rajonin e Prishtinës, ndërprerjet do të nisin nga ora 09:00 deri në 12:00, duke përfshirë zona si Gazmend Zajmi, Kodra e Diellit, Muharrem Fejza, Mati 1 dhe Lagjja e Spitalit. Sipas KEDS-it, punimet lidhen me kalimin e ngarkesës nga NS Prishtina 7 në NS Prishtina 2.
Në Podujevë, nga ora 09:00 deri në 18:00, pa energji do të mbeten fshatrat Sibofc, Lluzhan, Penuhë, Lupç i Epërm, Llugë, Majac dhe Popovë, për shkak të punimeve në rrjet.
Në rajonin e Pejës, ndërprerjet do të zgjasin nga 08:30 deri në 16:00, duke prekur fshatrat Ramun, Gllaviqicë, Leshan, Jabllanicë, Rosuja dhe Cvërk e Thatë. Arsyeja është energjizimi i trafos së re dhe demontimi i trafos së vjetër.
Në Prizren, përkatësisht në zonën e Fushë Kosovës II, ndërprerja do të jetë nga 10:00 deri në 15:00, ku do të preken dhjetëra rrugë dhe lagje për shkak të mirëmbajtjes preventive të nënstacionit. Po ashtu, në Dragash, nga 11:00 deri në 15:00, pa rrymë do të mbeten disa fshatra të Opojës, përfshirë Blaq, Brodosanë, Buzez, Kuk dhe Zaplluxhë.
Në rajonin e Mitrovicës, konkretisht në Vushtrri, ndërprerjet do të ndodhin nga 11:00 deri në 15:00, duke prekur disa fshatra si Studime, Karaqë, Gojbulë, Miraqë dhe Gumnishtë, për shkak të vendosjes së shtyllave të reja.
Ndërkaq, në Gjilan, përkatësisht në Kamenicë, një ndërprerje e shkurtër do të ndodhë nga 00:10 deri në 00:20, ku pa energji do të mbeten të gjitha daljet 10 kV. Kjo lidhet me rehabilitimin e pajisjeve transformuese dhe kalimin e ngarkesës nga TR1 në TR2.
KEDS u bën thirrje qytetarëve dhe bizneseve që të planifikojnë aktivitetet e tyre me kohë, duke marrë parasysh oraret e ndërprerjeve.
