Kompania për Distribuimin e Energjisë Elektrike në Kosovë (KEDS) ka njoftuar se të enjten, më 14 maj 2026, do të realizohen punime për siguri të sistemit energjetik dhe projekte investive, çka do të shkaktojë ndërprerje të planifikuara të energjisë elektrike në disa komuna të vendit.
Sipas njoftimit, ndërprerjet do të prekin zona në Prishtinë, Pejë, Prizren, Ferizaj, Mitrovicë, Gjakovë dhe Gjilan.
Në Prishtinë, ndërprerje do të ketë në zonën e Orllanit nga ora 10:00 deri në 15:30, ndërsa në disa pjesë të qendrës së kryeqytetit, përfshirë Dodonën, Diletacionin, Pallatin e Rinisë, Kuvendin, Qendrën dhe rrugë të tjera kryesore, energjia do të ndërpritet nga 09:00 deri në 18:00 për shkak të projekteve investive.
Në Pejë, ndërprerjet do të zgjasin nga 09:00 deri në 17:00, duke përfshirë zona si Krushevë, Zllakuqan, Radullovc, Ranoc, Berkovë dhe Rudicë.
Në Prizren, ndërprerje do të ketë në Gorozhup, Mile, Plane, Zhur, si dhe në Mamushë dhe disa fshatra përreth, ndërsa në zonën e Dubravës dhe Shirokës do të realizohen punime investive.
Në Ferizaj, pa energji do të mbeten Baza e Asfaltit, Jeta e Re, Gracka e Vjetër, Topliqan dhe Gracka e Vogël nga 09:00 deri në 16:00.
Në Mitrovicë, ndërprerjet do të prekin Shupkovcin, Kçiqin e Vogël dhe Kçiqin e Madh.
Në Gjakovë, punimet do të shkaktojnë ndërprerje në Brekoc dhe disa fshatra përreth, përfshirë Moglicën, Godenin, Jahocin, Prushin, Raçën dhe Zhubin.
Ndërsa në Gjilan, ndërprerjet do të jenë më të gjera, duke përfshirë një numër të madh lagjesh të qytetit dhe fshatra përreth, për shkak të mirëmbajtjes së nënstacioneve dhe pastrimit të trasesë.
KEDS u ka bërë thirrje qytetarëve për mirëkuptim, duke theksuar se këto ndërhyrje janë të nevojshme për sigurinë dhe stabilitetin e furnizimit me energji elektrike.
