Korporata Energjetike e Kosovës (KEK) ka hedhur poshtë raportimet për mungesë të prodhimit vendor të energjisë elektrike dhe ka siguruar qytetarët se nuk do të ketë ndërprerje në furnizim.
“Nuk do të ketë ndërprerje të energjisë elektrike, këtë ta kemi të qartë,” deklaroi Kryeshefi Ekzekutiv i KEK-ut, Gramos Hashani, gjatë një konference për media, duke reaguar ndaj paralajmërimeve të mëhershme nga KESCO për mungesë të prodhimit dhe nevojën për kursim.
Hashani sqaroi se kishte pasur një pasiguri në deklarimin e kapaciteteve nga termocentrali “Kosova A”, por ajo ishte keqinterpretuar. “Ka pasur pasiguri nga ekipi i termocentralit ‘Kosova A’ për ta deklaruar kapacitetin. Kjo është keqkuptuar dhe janë dhënë deklarata të pasakta se KEK-u për herë të parë pas 25 vjetësh nuk po prodhon asnjë megavat brenda ditës – gjë që nuk është e vërtetë,” theksoi ai.
Sipas tij, KEK ka korrigjuar deklarimin e kapaciteteve dhe njësia A3 e “Kosova A” pritet të prodhojë 110 megavat energji për orë ditën e nesërme. “Ne e deklarojmë prodhimin një ditë përpara dhe është bërë korrigjimi i njoftimit. Operimi po vazhdon normalisht,” sqaroi ai.
Duke iu referuar gjendjes teknike të termocentraleve, Hashani nënvizoi se KEK është në fazë modernizimi dhe përballje me sfida të natyrshme për shkak të moshës së pajisjeve. “’Kosova A’ ka 60 vite, ndërsa ‘Kosova B’ ka 40. Jemi në proces rehabilitimi – për njësinë A3 është hapur tender në vlerë prej 137 milionë eurosh për modernizim dhe rehabilitim,” tha ai.
KESCO, nga ana tjetër, kishte paralajmëruar për mungesë të theksuar të prodhimit vendor të energjisë duke u kërkuar konsumatorëve të kursejnë energjinë në ditët në vijim.
KEK e ka mohuar kategorikisht këtë skenar, duke bërë të ditur se pavarësisht sfidave teknike në termocentralet “Kosova A” dhe “Kosova B”, prodhimi nuk ka pësuar kolaps. Ata kanë konfirmuar se janë duke punuar në sanimin e defekteve të paparashikueshme që lidhen me vjetërsinë e pajisjeve prodhuese.
Qytetarët janë siguruar se KEK do të vazhdojë me kapacitetet e planifikuara dhe nuk pritet ndonjë ndërprerje e energjisë elektrike në vend.
