Komandanti i misionit të KFOR-it të udhëhequr nga NATO, gjeneralmajor Özkan Ulutaş, është takuar të martën në Shtabin e KFOR-it në Kampin Film City me presidentin e Listës Serbe, Zlatan Elek, me kërkesë të këtij të fundit.
Në takim morën pjesë edhe nënkryetari i Listës Serbe, Igor Simić, deputetja Jovana Radosavljević dhe kryetari i Mitrovicës së Veriut, Milan Radojević.
Sipas KFOR-it, gjatë takimit u diskutua për një sërë çështjesh që lidhen me situatën e sigurisë në veri të Kosovës, si dhe për procesin e vazhdueshëm të optimizimit të pranisë së KFOR-it.
KFOR: Optimizimi do të bëhet gradualisht
Gjeneralmajor Ulutaş theksoi se procesi i optimizimit të KFOR-it është nisur si rezultat i përmirësimit të situatës së sigurisë në Kosovë.
Megjithatë, ai bëri të qartë se ndryshimet do të realizohen në mënyrë graduale dhe se procesi bazohet në kushte dhe mund të përmbyset, nëse zhvillimet e ardhshme ndikojnë në sigurinë në Kosovë apo në stabilitetin rajonal.
KFOR-i, sipas tij, do të mbetet plotësisht i pajisur dhe i pozicionuar për t’iu përgjigjur çdo zhvillimi të rëndësishëm, në përputhje me mandatin e tij të përcaktuar nga Kombet e Bashkuara.
“KFOR-i mbetet reaguesi i parë për Manastirin e Deçanit”
Në takim u diskutua edhe siguria e Manastirit të Deçanit.
Komandanti Ulutaş theksoi se KFOR-i mbetet reaguesi i parë për sigurinë e Manastirit të Deçanit dhe se misioni është i përkushtuar për garantimin e sigurisë së tij.
Ndërkohë, ai sqaroi se kalimi gradual i pranisë së KFOR-it nga ura kryesore në Mitrovicë ka hyrë në fazën fillestare.
KFOR: Do të ruajmë prani të fortë në veri
KFOR-i thekson se ndryshimi i pranisë në ura dhe në pika të caktuara nuk nënkupton tërheqje nga veriu i Kosovës.
Sipas Ulutaş, pas përfundimit të procesit të optimizimit, KFOR-i do të mbajë një prani të fortë në Mitrovicën e Veriut dhe në pjesën veriore të Kosovës, në interes të të gjitha komuniteteve.
Mesazhi i KFOR-it vjen në një periudhë kur në Kosovë po diskutohet për ndryshimet graduale në vendosjen e trupave të NATO-s dhe për ndikimin e tyre në sigurinë e veriut.
