Komisioni Evropian ka paralajmëruar Hungarinë për masa ligjore në rast se miratohet projektligji i diskutueshëm i paraqitur nga partia konservatore nacionaliste Fidesz, e kryesuar nga kryeministri Viktor Orbán, i cili kufizon punën e organizatave joqeveritare të financuara nga jashtë.
Projektligji, i propozuar në parlamentin hungarez, synon të vendosë rregulla të ashpra mbi organizatat joqeveritare (OJQ), të cilat sipas Brukselit përbëjnë një shkelje serioze të ligjeve të Bashkimit Evropian. Drafti i ligjit mbi “transparencën në jetën publike” parashikon futjen në listën e zezë të OJQ-ve që marrin financime nga jashtë dhe konsiderohen si kërcënim për sovranitetin e Hungarisë.
Komisioni Evropian ka kërkuar tërheqjen e këtij projektligji nga procesi legjislativ, ndërsa nëse ligji miratohet, nuk do të hezitojë të marrë masat e nevojshme, përfshirë nisjen e procedurave për shkelje ligjore, të cilat mund të përfshijnë edhe gjoba të mëdha për Hungarinë.
Sipas legjislacionit të propozuar, OJQ-të e financuara nga jashtë duhet të marrin miratimin e administratës tatimore për të vazhduar veprimtarinë. Nëse një organizatë financon aktivitetet e saj në mënyra të tjera, ajo do të duhet të paguajë një gjobë prej 25 herë shumës së financimeve të marra jashtë vendit. Në rast të mosrespektimit të këtyre kushteve, organizata rrezikon shpërbërjen dhe ndalimin e veprimtarisë së saj.
Organizatat joqeveritare luajnë një rol të rëndësishëm në shoqëri, duke mbrojtur të drejtat e njeriut, mjedisin dhe shëndetin publik, me shembuj të njohur si Mjekët pa Kufij, Amnesty International dhe Greenpeace.
Kryeministri Viktor Orbán, i cili ka pasur tensione të vazhdueshme me Bashkimin Evropian gjatë 15 viteve në pushtet, përballet me presion të shtuar përpara zgjedhjeve parlamentare që do të mbahen në prill të vitit të ardhshëm. Në skenën politike po shfaqet një sfidues i ri konservator, Péter Magyar, i cili ka larguar nga partia e kryeministrit dhe ka formuar partinë e re “Tisza”, e cila kryeson sondazhet e opinionit përpara Fidesz-it të Orbánit prej disa muajsh.
Ky zhvillim përbën një tjetër pikë të tensionit midis Hungarisë dhe institucioneve evropiane lidhur me respektimin e standardeve demokratike dhe lirinë e shoqërisë civile në vend.
