Në orën 10:00 të paradites së sotme, Komisioni për Çështjet Ligjore dhe Administratën Publike zhvillon mbledhjen ku do të diskutohet kërkesa e Partisë Demokratike për shkarkimin e Presidentit të Republikës, Bajram Begaj, me akuzën se ka kryer shtatë shkelje të rënda të Kushtetutës.
Demokratët e depozituan kërkesën në Kuvend më 15 tetor, duke argumentuar se Presidenti Begaj ka tejkaluar kompetencat kushtetuese dhe ka vepruar në kundërshtim me ligjin themelor në disa raste të veçanta.
Sipas dokumentit të paraqitur nga PD, shkeljet përfshijnë:
1️⃣ Dekretimin e zgjedhjeve në Tiranë në kundërshtim me Kushtetutën;
2️⃣ Ndërhyrjen në mandatin e anëtarëve të Gjykatës Kushtetuese dhe cenimin e pavarësisë së saj;
3️⃣ Dekretimin e ligjit për Komisionet Hetimore, që sipas PD-së, bie ndesh me ndarjen e pushteteve;
4️⃣ Dekretimin e “Diellës” si ministre virtuale, gjë që demokratët e konsiderojnë shkelje serioze të rendit kushtetues;
5️⃣ Mosreagimin ndaj përfshirjes së trupës diplomatike në fushatën elektorale të vitit 2025;
6️⃣ Ndërhyrjen e kabinetit presidencial në procesin zgjedhor;
7️⃣ Dhe favorizimin e një kompanie sigurimesh që ka përfituar tenderë nga Presidenca, ndërsa ka punësuar fiktivisht djalin e Presidentit. PD pretendon gjithashtu se vetë Begaj figuron i punësuar në një klinikë private në Tiranë.
Sipas nenit 90 të Kushtetutës, Presidenti i Republikës mund të shkarkohet vetëm për shkelje të rënda të Kushtetutës ose për kryerje të një krimi të rëndë. Propozimi për shkarkim duhet të bëhet nga të paktën 35 deputetë dhe të miratohet me të paktën 94 vota në seancë plenare.
Nëse Kuvendi e miraton kërkesën, çështja i kalon Gjykatës Kushtetuese, e cila është e vetmja që mund të konstatojë fajësinë dhe të deklarojë shkarkimin përfundimtar të Presidentit.
Mbledhja e sotme pritet të jetë e tensionuar, pasi opozita kërkon nisjen e menjëhershme të procedurës, ndërsa mazhoranca ende nuk ka dhënë një qëndrim të qartë nëse do të mbështesë apo jo kërkesën e demokratëve.
