Mbetja e Kosovës jashtë Këshillit të Evropës (KiE) po shihet si një humbje e rëndësishme për vendin dhe qytetarët e saj. Avokati i Popullit, Naim Qelaj, në një intervistë për “Kallxo.com”, ka vlerësuar se mosanëtarësimi në këtë organizatë – e cila cilësohet si paradhomë e Bashkimit Evropian – sjell pasoja të shumëfishta.
Sipas Qelajt, përjashtimi nga KiE privon qytetarët e Kosovës nga një e drejtë ndërkombëtare e rëndësishme, duke ndikuar në përpjekjet për avancim demokratik dhe mbrojtje të të drejtave të njeriut.
“Vetë anëtarësimi i Kosovës në këtë organizatë do të ishte tregues i qartë dhe indikator i rëndësishëm se shteti ka arritur të përmbushë standardet demokratike evropiane. Kjo do të kishte një domethënie të madhe për qytetarët dhe për vetë imazhin e Kosovës në arenën ndërkombëtare,” u shpreh Qelaj.
Ai theksoi se mungesa e pjesëmarrjes në Këshillin e Evropës i pengon qytetarët kosovarë të kenë qasje në mekanizmat ndërkombëtarë të drejtësisë dhe të drejtave të njeriut, duke krijuar një boshllëk në mbrojtjen dhe avancimin e të drejtave themelore.
