Kombëtarja e Kosovës ka barazuar pa gola, 0-0, ndaj Izraelit në stadiumin “Fadil Vokrri” në Prishtinë, në ndeshjen e vlefshme për xhiron e pestë të Ligës B të Ligës së Kombeve.
“Dardanët” luajtën rreth 30 minutat e fundit me një lojtar më pak, pasi Veldin Hoxha u përjashtua me karton të kuq, pas dy kartonëve të verdhë. Megjithatë, Kosova arriti ta ruajë rezultatin deri në fund të takimit.
Në pjesën e parë, përfaqësuesja kosovare ishte më kërkuese dhe krijoi disa raste të mira shënimi. Lindrit Kamberi goditi shtyllën, ndërsa Milot Rashica ishte pranë realizimit të golit.
Në pjesën e dytë, ritmi i lojës ra dhe rastet e rrezikshme para portave munguan, me të dyja skuadrat që nuk arritën ta ndryshonin rezultatin.
Pas këtij barazimi, Kosova numëron gjashtë pikë, ndërsa Izraeli ka tri pikë.
Për të siguruar vendin e dytë në grup, Kosovës i nevojitet fitorja në ndeshjen e fundit ndaj Irlandës, e cila do të zhvillohet më 17 nëntor në Dublin.
