Këshilli Prokurorial i Kosovës (KPK) ka vendosur sot, më 2 tetor 2026, ta largojë Blerim Isufajn nga pozita e Kryeprokurorit të Prokurorisë Speciale të Republikës së Kosovës.
Vendimi është marrë në një mbledhje të jashtëzakonshme të KPK-së, e cila ishte thirrur për të diskutuar lidhur me performancën dhe punën e Isufajt në drejtimin e Prokurorisë Speciale. Sipas raportimeve të sotme, vendimi është marrë me 6 vota për dhe një kundër.
Pas largimit të Isufajt nga pozita drejtuese, KPK ka caktuar prokurorin Dren Paca ushtrues detyre të Kryeprokurorit të Prokurorisë Speciale, deri në plotësimin e pozitës sipas procedurave ligjore.
Isufaj mbetet prokuror në Prokurorinë Speciale
Sipas njoftimit të KPK-së, vendimi nuk nënkupton largimin e Isufajt nga sistemi prokurorial. Ai do të vazhdojë ta ushtrojë funksionin e prokurorit në Prokurorinë Speciale.
KPK ka bërë të ditur se vendimi për largimin nga pozita e Kryeprokurorit është marrë në mbështetje të nenit 22, paragrafit 5, të Ligjit për Këshillin Prokurorial të Kosovës, të ndryshuar dhe plotësuar.
KPK përmend keqmenaxhimin dhe performancën
Në arsyetimin e bërë publik, KPK thotë se gjatë ushtrimit të detyrës së Kryeprokurorit janë evidentuar dhe konstatuar, ndër të tjera:
- keqmenaxhimi i Prokurorisë Speciale;
- jokompetenca në ushtrimin e funksionit të Kryeprokurorit;
- dështimi në përmbushjen e detyrave dhe përgjegjësive të përcaktuara me ligj;
- mospërmbushja e standardeve të kërkuara të performancës, sipas vlerësimit të realizuar në pajtim me dispozitat ligjore dhe aktet nënligjore.
KPK thekson se këto janë rrethana që, sipas vlerësimit të tij, lidhen drejtpërdrejt me ushtrimin e funksionit, përgjegjësitë ligjore dhe standardet profesionale e institucionale të kërkuara për drejtimin e Prokurorisë Speciale.
Sipas KPK-së, secila prej këtyre rrethanave, veçmas, përbën bazë për largimin nga pozita.
Vendimi vjen pas përplasjeve për punën e Speciales
Vendimi i sotëm vjen pas diskutimeve të zhvilluara gjatë ditëve të fundit në KPK lidhur me efikasitetin e Prokurorisë Speciale.
Më 2 shtator, KPK kishte refuzuar miratimin e raportit të punës së Prokurorisë Speciale për vitin 2025. Edhe më 1 tetor, në KPK pati diskutime për efikasitetin e kësaj prokurorie dhe mënyrën e menaxhimit të saj.
Instituti i Kosovës për Drejtësi (IKD) kishte shprehur shqetësim për thirrjen e mbledhjes së jashtëzakonshme, duke argumentuar se llogaridhënia nuk duhet të përdoret për vendimmarrje të shpejtë dhe të paqartë ndaj një kryeprokurori.
Dren Paca merr përkohësisht drejtimin
KPK ka arsyetuar se caktimi i Dren Pacës si ushtrues detyre synon të sigurojë vazhdimësinë e menjëhershme të funksionimit të Prokurorisë Speciale dhe ushtrimin e pandërprerë të kompetencave të saj.
Paca do ta ushtrojë këtë funksion deri në plotësimin e pozitës së Kryeprokurorit të Prokurorisë Speciale, në pajtim me procedurat dhe kompetencat e përcaktuara me legjislacionin në fuqi.
KPK: Efikasiteti i Speciales kërkon ndërhyrje institucionale
Në njoftimin e tij, KPK ka thënë se mënyra e menaxhimit të Prokurorisë Speciale, veçanërisht gjatë katër viteve të fundit, sipas vlerësimit të Këshillit, ka ndikuar në dobësimin e efikasitetit dhe rezultateve institucionale.
Këshilli ka deklaruar se vëmendje e veçantë do t’i kushtohet forcimit të kapaciteteve dhe rezultateve në luftimin e krimit të organizuar dhe transnacional, përfshirë kontrabandimin e migrantëve, trafikimin e narkotikëve, trafikimin e qenieve njerëzore, pastrimin e parave dhe veprimtarinë e organizatave kriminale ndërkufitare.
KPK ka thënë gjithashtu se do të vazhdojë të ushtrojë kompetencat e tij ligjore në funksion të pavarësisë, profesionalizmit, integritetit, llogaridhënies dhe efikasitetit të sistemit prokurorial.
