Një ngjarje tronditëse ka ndodhur në Kolumbi, ku një grua 21-vjeçare, shtatzënë në muajin e tetë, është gjetur e vrarë me disa plagë nga thika, ndërsa foshnja që mbante në bark rezulton e zhdukur.
Viktima, Maria Camila Potosi, u gjet më 20 korrik pranë lumit Melendez, në zonën La Buitrera të qytetit Cali. Sipas mediave kolumbiane El Colombiano dhe RCN Noticias, ajo kishte të paktën katër plagë me thikë dhe foshnja ishte nxjerrë nga barku i saj. E reja ishte raportuar e zhdukur katër ditë më parë, transmeton Klankosova.
Sipas autoriteteve, Potosi ishte parë për herë të fundit e gjallë më 16 korrik, rreth orës 16:16. Kamerat e sigurisë e filmuan teksa largohej me motoçikletë së bashku me një grua ende të paidentifikuar. Mediat lokale raportojnë se gruaja ishte paraqitur në shtëpinë e familjes së partnerit të viktimës në Melendez, duke u prezantuar si shoqe e saj.
Më 24 korrik, familjarët e gruas që shfaqet në pamjet filmike e dorëzuan atë tek autoritetet pasi e njohën në video. Ish-partneri i saj, Carlos Rincon, deklaroi se ajo nuk ishte kthyer në shtëpi natën kur Potosi u zhduk dhe nuk iu ishte përgjigjur telefonatave apo mesazheve të tij. Sipas tij, gruaja ishte rikthyer një ditë më vonë duke u sjellë “sikur nuk kishte ndodhur asgjë”.
Rincon pretendon gjithashtu se ish-partnerja e tij i kishte gënjyer më parë dy herë duke i thënë se ishte shtatzënë, ndërsa në një rast kishte pretenduar se e kishte humbur foshnjën. Megjithatë, autoritetet nuk kanë konfirmuar ende nëse ajo ka lidhje direkte me zhdukjen e foshnjës së Potosit.
Komandanti i Policisë së Calit, Herbert Benavides, konfirmoi se gruaja është vënë nën akuzë. Hetuesit dyshojnë se në krim mund të jenë përfshirë edhe të paktën katër persona të tjerë, por deri më tani nuk janë kryer arrestime të tjera.
Ndërkohë, kryebashkiaku i Calit, Alejandro Eder, ka shpallur një shpërblim prej 200 milionë pesos kolumbiane (rreth 63 mijë dollarë) për çdo informacion që çon në identifikimin dhe arrestimin e personave përgjegjës.
Prokuroria kolumbiane po e heton çështjen për veprat penale të zhdukjes me forcë, torturës së rëndë, fshehjes së provave dhe vrasjes së rëndë. Deri tani nuk ka asnjë informacion zyrtar për vendndodhjen apo gjendjen e foshnjës.
