Bashkimi Evropian po përballet me pasoja të rënda nga kriza energjetike e nxitur nga konflikti në Iran, ndërsa Komisioni Evropian u ka bërë thirrje shteteve anëtare për bashkëpunim më të ngushtë dhe veprime të koordinuara për të përballuar situatën.
Sipas të dhënave zyrtare, kostot për importin e lëndëve djegëse fosile janë rritur me rreth 24 miliardë euro që nga fillimi i konfliktit, duke shtuar presionin mbi ekonomitë evropiane dhe mbi faturat e qytetarëve.
Presidentja e Komisionit Evropian, Ursula von der Leyen, theksoi se zgjidhja afatgjatë qëndron te përshpejtimi i kalimit drejt energjive vendase dhe të pastra, në mënyrë që Evropa të jetë më e mbrojtur ndaj krizave gjeopolitike.
Në këtë kuadër, një nga zhvillimet më të rëndësishme është rikthimi i energjisë bërthamore në qendër të strategjisë energjetike. Sipas dokumenteve të reja, ajo konsiderohet një komponent kyç për uljen e emetimeve të CO₂ dhe reduktimin e varësisë nga nafta dhe gazi.
Komisioni sugjeron gjithashtu që shtetet të mos mbyllin para kohe centralet ekzistuese bërthamore dhe të investojnë në teknologji të reja, përfshirë mini-centralet bërthamore.
Në të njëjtën kohë, janë propozuar masa konkrete për qytetarët dhe bizneset, si lehtësime tatimore për instalimin e paneleve diellore, pompave të ngrohjes dhe blerjen e makinave elektrike.
Një tjetër hap i rëndësishëm është krijimi i një mekanizmi të ri për mbikëqyrjen e rezervave të karburanteve në të 27 vendet e BE-së, me qëllim koordinimin e mbushjes së depozitave të gazit dhe shmangien e rritjeve të menjëhershme të çmimeve.
Brukseli synon gjithashtu të optimizojë shpërndarjen e karburantit të avionëve për të parandaluar mungesat në sektorin ajror, një tjetër sinjal se kriza energjetike po prek çdo hallkë të ekonomisë.
Mesazhi është i qartë: Evropa nuk mund të ecë më e ndarë në kohë krizash – ose bashkë, ose me pasoja më të rënda.
