Kryeministri në detyrë i Republikës së Kosovës, Albin Kurti, ka pritur në takim përfaqësues të kompanisë ndërkombëtare të telekomunikimit Ericsson, mes të cilëve edhe Zëvendëspresidentin Mikael Bäck.
Gjatë takimit, palët diskutuan për thellimin e bashkëpunimit mes Qeverisë së Kosovës dhe kompanisë suedeze, me të cilën tashmë është realizuar një sërë projektesh të rëndësishme, përfshirë modernizimin e rrjetit kombëtar të komunikimeve dhe mbulimin e territorit të Kosovës me rrjetin 4G dhe 5G.
Në vijim, u fol edhe për mundësitë e investimeve të reja në sektorin e telekomunikacionit, fushë në të cilën Ericsson ka një përvojë të gjerë dhe projekte të suksesshme në shtete të ndryshme të Evropës.
Kryeministri Kurti i falënderoi përfaqësuesit për vizitën dhe interesimin për të zgjeruar praninë e kompanisë në tregun kosovar, duke vlerësuar rolin e bashkëpunimeve strategjike në zhvillimin teknologjik të vendit.
Në mesin e delegacionit të “Ericsson” ishte edhe Florijeta Mulolli, përfaqësuese nga Kosova, ish-këshilltare e Drejtorit Ekzekutiv të kompanisë, e cila aktualisht mban postin e Drejtueses së Lartë të Llogarive.
