Kryetari i Partisë Demokratike të Kosovës (PDK), Memli Krasniqi, ka përcjellë një mesazh urimi për besimtarët myslimanë me rastin e festës së Kurban Bajramit, duke theksuar vlerat universale që kjo ditë përçon: mëshirë, afërsi, falje dhe sakrificë.
Në mesazhin e tij, Krasniqi u mbështet në ajetin kuranor “E mëshira Ime ka përfshirë çdo gjë” (Surja El-A’raf), duke e cilësuar këtë festë si një rikujtim të fuqishëm për nevojën e mirëkuptimit dhe ndarjes së dashurisë në kohë sfidash dhe padrejtësish.
“Sakrifica personale në emër të një të mire më të madhe është një nga mësimet kryesore të Kurban Bajramit. Uroj që këto vlera të na udhëheqin në familje, në shoqëri, në vendimmarrje dhe në jetën tonë të përditshme,” theksoi ai.
Kreu i PDK-së shtoi se shoqëria kosovare ka nevojë më shumë se kurrë për solidaritet dhe mirëbesim, duke ftuar qytetarët të frymëzohen nga kjo festë për të qenë më të bashkuar dhe më të përkushtuar ndaj atdheut.
“Zoti e bekoftë popullin tonë me paqe, shëndet dhe mirësi. Gëzuar Kurban Bajramin!” përfundoi Krasniqi.
