Kryeministri i Kosovës, Albin Kurti, ka kërkuar raporte të detajuara nga Ministria e Drejtësisë dhe Ministria e Punëve të Brendshme për lëshimet e mundshme institucionale që i paraprinë vrasjes së Arlinda Zekajt në Vitomiricë të Pejës. Ai ka bërë të ditur se raportet duhet t’i dorëzohen deri të nesërmen, para orës 18:00, dhe se do të bëhen publike.
Duke folur në mbledhjen e Qeverisë, Kurti ka thënë se rasti i vrasjes së Zekajt, për të cilën si autor dyshohet kunati i saj, ngre shqetësime serioze për funksionimin e institucioneve përgjegjëse për sigurinë dhe drejtësinë.
Sipas Kurtit, viktima kishte qenë subjekt i paralajmërimeve që nuk morën përgjigjen e duhur nga institucionet.
“Drejtësia në Kosovën tonë, dhe ndoshta jo vetëm në Kosovë, fatkeqësisht nuk është në mbrojtje të të dobëtit, përkundrazi, drejtësia shpesh ka dalë në krahun e të fortit”, ka deklaruar Kurti.
Ai e ka cilësuar reformimin dhe përmirësimin e funksionimit të drejtësisë si urgjencë kombëtare.
Raporti për lëshimet institucionale pritet deri nesër
Kurti ka bërë të ditur se ka kërkuar nga Ministria e Drejtësisë dhe Ministria e Punëve të Brendshme raporte të detajuara, me evidenca për veprimet dhe lëshimet e mundshme në secilën hallkë institucionale.
Sipas tij, raportet duhet të dorëzohen deri nesër, para orës 18:00, dhe më pas të publikohen për qytetarët.
Ndërkohë, ministrja e Drejtësisë, Donika Gërvalla, në cilësinë e koordinatores kombëtare për mbrojtjen nga dhuna në familje, dhuna ndaj grave dhe dhuna me bazë gjinore, kishte thirrur një mbledhje urgjente me përfaqësues të institucioneve përkatëse të sigurisë dhe drejtësisë në nivel qendror dhe lokal.
Qëllimi, sipas Kurtit, ishte mbledhja e informacioneve të sakta për rrethanat e rastit dhe përgjegjësitë institucionale.
Qeveria miraton projektligjin për ekstradim me Suedinë
Në të njëjtën mbledhje, Qeveria e Kosovës ka miratuar projektligjin për ratifikimin e marrëveshjes së ekstradimit ndërmjet Kosovës dhe Mbretërisë së Suedisë.
Ministrja e Drejtësisë, Donika Gërvalla, ka thënë se marrëveshja synon forcimin e bashkëpunimit juridik ndërkombëtar në luftimin e kriminalitetit.
Ajo përcakton procedurat dhe kushtet për ekstradimin e personave të kërkuar, si për ndjekje penale, ashtu edhe për ekzekutimin e dënimeve të shqiptuara nga autoritetet gjyqësore.
Sipas Gërvallës, marrëveshja parasheh gjithashtu respektimin e të drejtave dhe lirive themelore të njeriut.
Ratifikimi synon të plotësojë kuadrin ligjor të Kosovës dhe të lehtësojë bashkëpunimin me autoritetet suedeze në çështjet penale.
