Kryeministri në detyrë dhe njëherësh lideri i Lëvizjes Vetëvendosje (LVV), Albin Kurti, ka bërë një hap të ri drejt zhbllokimit të krizës politike në vend, duke i dërguar një letër zyrtare kryetarit të Lidhjes Demokratike të Kosovës (LDK), Lumir Abdixhiku, me ftesë për bashkëqeverisje.
Në letrën e siguruar nga burime brenda LVV-së, Kurti thekson rëndësinë e një marrëveshjeje politike që do të mundësonte krijimin e institucioneve funksionale pas më shumë se pesë muajsh bllokadë institucionale.
“Duke e konsideruar situatën aktuale dhe nevojën për institucione funksionale, ftoj LDK-në që bashkërisht të ndërtojmë një marrëveshje politike për bashkëqeverisje,” thuhet në letrën që Kurti ia ka dërguar Abdixhikut.
Ftesa vjen në një moment kritik për Kosovën, me Kuvendin ende të pakonstituuar dhe Qeverinë që funksionon në cilësinë e ekzekutivit në detyrë. Ngërçi politik ka lënë të pezulluara proceset e brendshme ligjvënëse dhe ka shkaktuar shqetësime edhe tek partnerët ndërkombëtarë, përfshirë Bashkimin Evropian dhe Shtetet e Bashkuara.
LVV-ja, e cila doli fituese e zgjedhjeve të fundit me 48 ulëse në Kuvend, nuk ka arritur të sigurojë shumicën e nevojshme për formimin e qeverisë, duke e vështirësuar tejkalimin e krizës politike pa një marrëveshje ndërpartiake.
Përgjigjja e LDK-së ndaj kësaj ftese pritet me interes të madh, pasi mund të përcaktojë drejtimin e zhvillimeve politike në javët në vijim.
