Kryeministri në detyrë i Republikës së Kosovës, Albin Kurti, mori pjesë në lansimin zyrtar të Organizatës së Menaxhimit Kolektiv për të Drejtat e Autorit në Fushën e Muzikës – Kosova Music Rights Society (KMRS), ngjarje e organizuar nga Ministria e Kulturës, Rinisë dhe Sportit në bashkëpunim me KMRS-në.
Konferenca me temën “Fuqizimi i të drejtave muzikore përmes menaxhimit kolektiv” shënoi një moment historik për industrinë muzikore në vend, duke vendosur bazat për mbrojtjen e të drejtave autoriale të artistëve kosovarë.
Në fjalën e tij, kryeministri Kurti theksoi rëndësinë e kësaj nisme për kulturën dhe ekonominë krijuese të Kosovës:
“Sot po shënojmë një hap që shkon përtej muzikës. Në thelb të krijimit të Kosova Music Rights Society qëndron ideja e të drejtës për të zotëruar frytin e punës sonë, për të fituar edhe autori nga dobia publike. Kjo nuk është vetëm çështje ligjore, por edhe morale, kulturore e filozofike.”
Kurti shtoi se KMRS përfaqëson më shumë se një organizatë teknike, duke e quajtur atë “një urë besimi midis krijuesve, shtetit dhe publikut”. Ai nënvizoi se Kosova me këtë hap bëhet pjesë e rrjeteve ndërkombëtare të mbrojtjes së të drejtave autoriale, përfshirë mundësinë e bashkëpunimit me organizata prestigjioze si SACEM e Francës.
“Shoqëria që njeh dhe mbron krijimtarinë është shoqëri që beson në vetvete, në të tashmen dhe në të ardhmen e saj. Ne do të mbetemi partnerë të palëkundur në zhvillimin e industrisë muzikore – nga kompozimi dhe interpretimi te prodhimi, shpërndarja dhe mbrojtja ligjore e veprës,” theksoi Kurti.
Kryeministri kujtoi gjithashtu se me Ligjin e ri për Kulturën, Ligjin për të Drejtat e Autorit dhe të Drejtat e Përafërta, si dhe me reformat në vazhdim, Qeveria e Kosovës po ndërton themelet e një sistemi që mbron krijuesin dhe nxit ekonominë krijuese kombëtare.
Ky lansim shënon fillimin e një epoke të re për artistët kosovarë, të cilët tashmë do të kenë një mekanizëm institucional për mbrojtjen dhe menaxhimin e të drejtave të tyre autoriale në nivel kombëtar dhe ndërkombëtar.
