Kryeministri, Albin Kurti, ka falënderuar deputetët që votuan në lexim të dytë ndryshimet në Ligjin për Parandalimin e Pastrimit të Parave dhe Luftimin e Terrorizmit, duke e cilësuar miratimin e tij si një hap të rëndësishëm drejt integrimit të Kosovës në sistemin evropian të pagesave SEPA.
Përmes një postimi në Facebook, Kurti tha se miratimi i këtij ligji i mundëson Kosovës të plotësojë kushtin e fundit për t’u integruar në SEPA (Single Euro Payments Area).
Transfertat bankare pritet të kushtojnë më pak
Sipas Kurtit, integrimi në këtë sistem do të mundësojë transferta bankare me kosto dukshëm më të ulët, duke sjellë përfitime për qytetarët, bizneset dhe mërgatën.
Ai vlerësoi se kursimet nga tarifat bankare mund të arrijnë rreth 58 milionë euro në vit.
SEPA synon të lehtësojë pagesat në euro ndërmjet vendeve pjesëmarrëse, duke i bërë ato më të thjeshta dhe më të përballueshme.
Megjithatë, miratimi i ligjit nuk nënkupton automatikisht anëtarësimin e menjëhershëm të Kosovës në SEPA, pasi procesi i integrimit varet edhe nga përmbushja dhe verifikimi i kërkesave përkatëse.
