Me rastin e 82-vjetorit të lindjes së profesor Ukshin Hotit, një prej figurave më të ndritura të mendimit politik dhe filozofik shqiptar, kryeministri në detyrë i Republikës së Kosovës, Albin Kurti, bashkë me zëvendëskryeministrin e parë në detyrë, Besnik Bislimi, vizituan Shtëpinë Muze të Hotit në Krushë të Madhe për të nderuar jetën dhe veprën e tij.
“Ukshin Hoti është një figurë dhe mendje e papërsëritshme. Aq e thellë për nga mençuria, aq e gjerë për nga dija, dhe aq e lartë për nga idetë, saqë ne e kemi obligim t’ia kujtojmë vetes tekstet e tij, për të ecur përpara në nivelin e detyrës kombëtare dhe historike”, u shpreh Kurti.
Ai theksoi nevojën për drejtësi dhe kërkoi nga faktori ndërkombëtar që t’i bëjë presion Serbisë për hapjen e arkivave të luftës, me qëllim ndriçimin e fatit të Hotit dhe rreth 1600 personave të zhdukur me dhunë gjatë luftës në Kosovë. Ukshin Hoti u zhduk pas lirimit nga burgu i Dubravës në vitin 1999 dhe fati i tij mbetet ende i pazbardhur.
Në të njëjtën ditë, Kurti mori pjesë edhe në ceremoninë e diplomimit të 450 studentëve të Universitetit “Ukshin Hoti” në Prizren, ku mbajti një fjalim përshëndetës si folës kryesor.
“Diplomimi është finalizimi i një pune të madhe. Kjo diplomë, qofte e para apo e fundit, është çelësi i një të ardhmeje dinjitoze,” deklaroi Kurti para studentëve, stafit akademik dhe të pranishmëve.
Ai vlerësoi lartë aktivitetet akademike dhe kulturore të Universitetit, duke përmendur panairin e punës dhe karrierës, promovimet e botimeve të reja si dhe shfaqjen e komedisë klasike “Tartufi” nga studentët e Filologjikut.
Kurti nënvizoi rëndësinë e qasjes ndërdisiplinare në arsim, ku shkenca dhe arti plotësojnë njëra-tjetrën, dhe përmbylli fjalimin me urime për të gjithë të diplomuarit:
“Të jeni krenarë për emrin e Universitetit tuaj dhe ta gëzoni diplomën nga ky institucion. Suksese të gjithëve!”
