Në përvjetorin e 27-të të vrasjes së vëllezërve Yll, Agron dhe Mehmet Bytyqi, Kurti ka thënë se kalimi i kohës nuk e zvogëlon detyrimin për drejtësi dhe zbardhjen e rastit.
“Vëllezërit Bytyqi janë dëshmia e qartë e krimeve të Serbisë ndaj shqiptarëve dhe, në të njëjtën kohë, e mungesës së plotë të vullnetit të Serbisë për të dhënë përgjegjësi për krimet e kryera. Kalimi i kohës nuk e shuan detyrimin për drejtësi. Përkundrazi, çdo vit që kalon e bën edhe më të rëndë barrën e pandëshkueshmërisë”, ka deklaruar Kurti.
Ai ka theksuar se Kosova, së bashku me Shtetet e Bashkuara të Amerikës, ka kërkuar vazhdimisht zbardhjen e këtij rasti dhe vendosjen e drejtësisë.
“Republika e Kosovës beson se paqja e qëndrueshme dhe marrëdhëniet ndërmjet shteteve dhe popujve të rajonit mund të ndërtohen vetëm mbi të vërtetën, përgjegjësinë dhe drejtësinë”, ka thënë Kurti.
Vëllezërit Bytyqi, shtetas amerikanë me origjinë shqiptare, u arrestuan në vitin 1999 nga forcat serbe pas përfundimit të luftës në Kosovë dhe më pas u vranë. Rasti i tyre ka mbetur për vite me radhë një nga çështjet më të ndjeshme në marrëdhëniet ndërmjet Kosovës, Serbisë dhe Shteteve të Bashkuara të Amerikës.
