Kryeministri në detyrë i Kosovës, Albin Kurti, ka vizituar sot Myftiun e Kosovës, Naim Tërnava, në selinë e Bashkësisë Islame të Kosovës (BIK), me rastin e festës së Kurban Bajramit.
Gjatë vizitës, Kurti i uroi Myftiut Tërnava dhe të gjithë besimtarëve myslimanë festën, duke vlerësuar rëndësinë e saj si simbol i sakrificës dhe solidaritetit.
Ai tha se Kurban Bajrami bart një mesazh të fuqishëm për përkushtimin dhe vlerësimin e atyre që kanë sakrifikuar për të mirën e përgjithshme.
“Vizitën e parë për festën e Kurban Bajramit, si për çdo vit, këtë vit vijmë te Bashkësia Islame e Kosovës për t’ia uruar Myftiut Naim Tërnava dhe bashkëpunëtorëve të tij këtë festë të sakrificës, e cila na e përkujton dhe vazhdimisht na mëson se edhe sakrifica është festë, sepse ne i gëzojmë të mirat dhe frytet e atyre që kanë sakrifikuar para nesh dhe kanë mundësuar që ne të kemi liri e prosperitet”, tha Kurti.
Ai kujtoi gjithashtu dëshmorët e kombit, duke veçuar edhe kontributin e imamëve gjatë luftës.
“Ne asnjëherë nuk e harrojmë që aty janë edhe 37 imamë hoxhallarë nga lufta”, u shpreh ai.
