Kushtrim Ahmeti ka fituar garën për rektor të ri të Universitetit të Tetovës, duke siguruar shumicën e votave në procesin zgjedhor të zhvilluar brenda institucionit.
Sipas rezultateve zyrtare, Ahmeti ka marrë 198 vota ose 59.46 për qind të votave të përgjithshme, duke lënë pas dy kandidatët e tjerë në garë.
Kandidati Fehari Ramadani ka siguruar 118 vota, që përbëjnë 35.44 për qind të votave, ndërsa rektori aktual, Jusuf Zejneli, ka marrë 17 vota ose rreth 5 për qind.
Premton universitet më konkurrues dhe të orientuar drejt dijes
Në programin e tij zgjedhor, Ahmeti ka theksuar synimin për ta bërë Universitetin e Tetovës më të fortë, më të hapur, më të organizuar dhe më konkurrues në nivel vendor dhe ndërkombëtar.
Platforma e tij zhvillimore bazohet në gjashtë shtylla kryesore:
- avancimin e veprimtarisë arsimore dhe sigurimin e cilësisë;
- zhvillimin e kërkimit shkencor;
- forcimin e bashkëpunimit ndërkombëtar dhe veprimtarisë aplikative;
- mbështetjen e studentëve dhe përmirësimin e standardit studentor;
- investimet në infrastrukturë dhe digjitalizim;
- qeverisjen, financimin dhe menaxhimin e qëndrueshëm institucional.
Po ashtu, programi parasheh rritjen e angazhimit të universitetit me komunitetin dhe forcimin e përgjegjësisë sociale.
Pas shpalljes së rezultateve, Ahmeti ka deklaruar se vizioni i tij është ndërtimi i një universiteti modern, të bazuar në dije, kërkim shkencor dhe inovacion, me fokus në përgatitjen e kuadrove profesionale dhe rritjen e cilësisë akademike.
Universiteti i Tetovës konsiderohet një nga institucionet më të rëndësishme të arsimit të lartë në Maqedoninë e Veriut, me një rol të veçantë në arsimin universitar në gjuhën shqipe.
