Kuvendi i Republikës së Kosovës ka miratuar në shqyrtim të parë Projektligjin mbi ndarjet buxhetore për vitin 2026, me vlerë rreth 4 miliardë euro. Seanca e jashtëzakonshme plenare u drejtua nga kryetarja Albulena Haxhiu, ndërsa projektligji kaloi me 66 vota për, 32 kundër dhe 5 abstenime.
Para shqyrtimit të projektligjit, deputetët votuan për shmangie nga afatet procedurale. Në emër të Qeverisë, ministri i Financave Hekuran Murati paraqiti arsyetimin e projektligjit, duke theksuar se vonesat kanë ardhur si pasojë e mungesës së funksionalitetit të Kuvendit në periudhën e kaluar. Sipas tij, projektligji i propozuar është ai i miratuar më 31 tetor 2025, me ndryshimin e vetëm që lidhet me pagën e 13-të.
Murati bëri të ditur se buxheti parasheh rreth 980 milionë euro për paga dhe shtesa, 545 milionë euro për mallra dhe shërbime, 1 miliard e 358 milionë euro për subvencione dhe transfere, si dhe 998.4 milionë euro për shpenzime kapitale. Të hyrat buxhetore janë planifikuar në 3.64 miliardë euro.
Kryetari i Komisionit për Buxhet, Enver Haliti, konfirmoi se komisioni funksional e ka shqyrtuar dhe rekomanduar projektligjin për miratim. Në emër të Lëvizjes Vetëvendosje, Arbërie Nagavci e cilësoi atë si buxhetin më të madh në historinë e vendit, duke paralajmëruar se muajin e ardhshëm do të sillet edhe një buxhet i ri për rishikim.
Nga opozita, deputeti i PDK-së Bedri Hamza kërkoi sqarime për urgjencën e procedimit, duke theksuar se rritja e shpenzimeve për subvencione dhe transfere mund të ngushtojë hapësirën fiskale në të ardhmen. Ndërkaq, Lumir Abdixhiku nga LDK ngriti shqetësimin për, siç tha ai, mosreflektimin e plotë të autonomisë së Kryeqytetit në buxhet.
Fjalën e mori edhe kryeministri Albin Kurti, i cili e cilësoi buxhetin si dokument me theks në siguri dhe mirëqenie. Ai konfirmoi se paga e 13-të për punonjësit publik do të jepet në pranverë dhe përfshin rritje të pensioneve, shtesave për fëmijë, asistencës sociale dhe mbështetjes për barna esenciale e bujqësi. Kurti paralajmëroi gjithashtu rikthimin e projektligjit për çmime tavan për produktet bazë.
Pas përfundimit të debatit, projektligji u miratua në lexim të parë. Kryetarja Haxhiu e cilësoi votimin si hap të rëndësishëm drejt realizimit të projekteve dhe shërbimeve publike që parashihen me buxhetin 2026. Sipas vendimit të Kuvendit, leximi i dytë do të mbahet të premten në orën 11:00.
