Lidhja Demokratike e Kosovës (LDK) ka sinjalizuar se është e gatshme të rifillojë bisedimet me Lëvizjen Vetëvendosje (LVV) për formimin e institucioneve të reja, pas vendimit të Kuvendit të partisë për të mbështetur vazhdimin e negociatave. Megjithatë, analistët vlerësojnë se përçarjet e thella brenda LDK-së mund ta bëjnë të vështirë arritjen e një marrëveshjeje funksionale.
Nënkryetari i LDK-së, Lufti Haziri, tha se partia ka marrë një vendim parimor për të kontribuar në ndërtimin e institucioneve dhe për të shmangur mbajtjen e zgjedhjeve të reja.
“LDK-ja do të marrë pjesë në procesin e bashkëpunimit për ndërtimin e institucioneve, duke dhënë kontribut në largimin e mundësisë për zgjedhje të tjera”, deklaroi Haziri për Radion Evropa e Lirë.
Tre parimet e LDK-së
Sipas Hazirit, LDK-ja do të negociojë mbi tri parime kryesore:
- marrëveshje gjithëpërfshirëse për Kuvendin, Qeverinë dhe Presidencën ose asnjë marrëveshje;
- dakordim për agjendën shtetërore dhe programin qeverisës;
- ndarje të qartë të përgjegjësive institucionale.
Ai tha se nëse LVV pranon këto parime, LDK-ja mund t’i përmbyllë çështjet e brendshme “brenda 24 orëve”.
Përçarjet mbeten pengesë
Megjithëse kryetari Lumir Abdixhiku mbijetoi mocionit për shkarkim në Kuvendin e LDK-së, votimi tregoi ndarje të thella në parti.
Nga 327 delegatë, 170 votuan pro vazhdimit të mandatit të Abdixhikut, ndërsa 152 ishin kundër, çka sipas njohësve të zhvillimeve politike dëshmon se uniteti brenda partisë mbetet i brishtë.
Analisti Rrahman Paçarizi vlerëson se deklaratat e LDK-së kanë për qëllim të shmangin perceptimin se partia po bllokon krijimin e institucioneve, por nuk garantojnë një marrëveshje reale.
Sipas tij, sfida kryesore do të jetë sigurimi i mbështetjes së të gjithë 18 deputetëve të LDK-së për një marrëveshje me LVV-në.
Edhe analisti Artan Muhaxhiri shprehet skeptik, duke vlerësuar se një pjesë e deputetëve të LDK-së mund të mos e mbështesin një koalicion të tillë.
Çelësi mbetet zgjedhja e presidentit
Një marrëveshje eventuale nuk do të mjaftonte vetëm për formimin e Qeverisë. Sfida kryesore mbetet zgjedhja e presidentit të Kosovës.
Për zgjedhjen e kreut të shtetit kërkohen:
- 80 vota në dy rundet e para të votimit;
- nëse dështon, në rundin e tretë mjaftojnë 61 vota.
Analistët vlerësojnë se sigurimi i 80 votave është skenari më i vështirë. Edhe nëse LVV-ja bashkon votat e saj me deputetët e komuniteteve joshumicë dhe me LDK-në, mbështetja unanime e të gjithë deputetëve të kësaj të fundit mbetet e pasigurt.
Seanca më 6 gusht
Seanca konstituive e Kuvendit është caktuar për 6 gusht, kur pritet të nisë zyrtarisht procesi i formimit të institucioneve të reja. Nëse partitë nuk arrijnë marrëveshje, veçanërisht për zgjedhjen e presidentit, Kosova mund të përballet sërish me zgjedhje të parakohshme, duke thelluar edhe më tej krizën politike. Burimi: https://www.evropaelire.org/
