Deputetja e Lidhjes Demokratike të Kosovës (LDK), Jehona Lushaku-Sadriu, ka deklaruar se konstituimi i Kuvendit dëshmon se institucionet mund të formohen kur ekziston vullneti politik mes subjekteve parlamentare.
Ajo tha se, pas ndryshimit të qëndrimit të Lëvizjes Vetëvendosje (LVV), LDK-ja iu bashkua seancës konstituive, ku u votua kandidatura e saj për nënkryetar të Kuvendit, Kujtim Shala.
“Kjo është një dëshmi se kur vullneti politik dhe ushtrimi i demokracisë bëhen më të lehta, formohen edhe institucionet. Do të thotë, po shihet që vetëm mungesa e vullnetit politik të grupit të parë parlamentar ka bërë që të ketë vonesa deri ditën e sotme. Ne, në seancën e fundit, u kemi bërë thirrje që t’ua njohin të drejtën partive politike për propozimin e emrave për nënkryetarë të tyre dhe vetëm pas ndërrimit të qëndrimit të tyre ne erdhëm dhe u bashkëngjitëm në seancë. U votua propozimi i kandidatit të LDK-së për nënkryetar, ashtu siç kemi propozuar ne, dhe i dhamë institucione vendit”, tha ajo.
Lushaku-Sadriu tha se qëndrimi i LDK-së kishte qenë që të shfrytëzohej deri në fund e drejta e dialogut dhe e paraqitjes së propozimeve.
Megjithatë, ajo tha se PDK-ja kishte dalë me një qëndrim të ri politik, duke vendosur të mos marrë pjesë në seancë.
“Është situatë e re për shkak se nuk ka pasur vullnet për votim të nënkryetarëve dhe nuk iu është njohur e drejta. Ju e patë që grupit të dytë parlamentar nuk iu votua kandidati i tyre dhe ishte e njëjta logjikë për të vazhduar. Sot ne u bëmë thirrje që të shfrytëzohet e drejta e dialogut dhe t’u bëhet thirrje të gjitha grupeve parlamentare që të vijnë dhe të bëjnë propozime. Ndërkohë, kemi një qëndrim politik të PDK-së për të mos marrë pjesë në seancë. Gjithsesi, ata do ta adresojnë çështjen në Gjykatën Kushtetuese, ndërsa ne do të kontribuojmë për sqarimin e ligjshmërisë dhe kushtetutshmërisë së institucioneve”, tha Lushaku-Sadriu.
