Lëvizja Vetëvendosje (LVV) është deklaruar për nismën e Partisë Demokratike të Kosovës (PDK) për plotësimin dhe ndryshimin e Ligjit për Dhomat e Specializuara dhe Zyrën e Prokurorit të Specializuar, të dorëzuar të hënën në Kuvendin e Kosovës.
LVV ka bërë të ditur se fillimisht pret vendimin e Gjykatës Kushtetuese lidhur me çështjen e konstituimit të Kuvendit, duke theksuar se kërkesa e paraqitur në Kushtetuese për këtë çështje nuk është tërhequr.
Sipas partisë në pushtet, para çdo hapi të mëtejshëm duhet të vlerësohen edhe implikimet juridike që mund të dalin nga vendimi i Gjykatës Kushtetuese.
Sa i përket projektligjit të PDK-së, LVV ka deklaruar se do ta shqyrtojë me kujdes nga pikëpamja juridike, përfshirë përputhshmërinë e tij me kornizën ligjore në fuqi dhe ndikimin e mundshëm në procedurat që po zhvillohen në Dhomat e Specializuara.
“Duke qenë se procedurat ndaj katër ish-krerëve të UÇK-së zhvillohen me ekipe të veçanta të mbrojtjes, çdo iniciativë duhet të vlerësohet me kujdes edhe në raport me interesat dhe strategjitë juridike të secilit rast”, thuhet në përgjigjen e LVV-së.
Partia ka theksuar se, në këtë fazë, e sheh të nevojshme ndërtimin e një qasjeje institucionale dhe shtetërore të koordinuar, të mbështetur në një analizë të plotë juridike.
LVV ka kërkuar që çdo veprim të ndërmerret vetëm pasi të jenë shqyrtuar pasojat e mundshme juridike, veçanërisht në raport me procedurën e apelit ndaj aktgjykimit të shkallës së parë për katër ish-krerët e UÇK-së.
“Qëllimi duhet të jetë që veprimet institucionale të jenë të menduara, të bashkërenduara dhe të mos krijojnë pasoja të padëshiruara për proceset gjyqësore në zhvillim”, ka deklaruar LVV.
Nisma e PDK-së, e dorëzuar më 21 shtator, parasheh ndryshime në kornizën ligjore që rregullon Dhomat e Specializuara. Sipas PDK-së, ndër ndryshimet e propozuara janë kufizimi i mandatit të Speciales dhe vendosja e monitorimit ndërkombëtar, ndërsa për disa prej krimeve të luftës parashihet që procedurat të zhvillohen në Kosovë.
Vendimi i LVV-së për të pritur fillimisht Kushtetuesen dhe për ta shqyrtuar nismën juridikisht vjen pak ditë pas aktgjykimit të Dhomave të Specializuara, me të cilin Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet dhe Rexhep Selimi me 13 vjet.