Mali i Zi ka hyrë në fazën finale të rrugës drejt Bashkimit Evropian, pasi në Bruksel është miratuar krijimi i një grupi pune që do të përgatisë traktatin e anëtarësimit – një hap kyç përpara anëtarësimit të plotë.
Vendimi është marrë nga Komiteti i Përfaqësuesve të Përhershëm (COREPER), duke sinjalizuar se procesi i zgjerimit po hyn në një fazë konkrete dhe më të avancuar. Grupi i ri do të merret me aspektet teknike dhe ligjore të marrëveshjes, duke përfshirë detajet për integrimin gradual të vendit në strukturat evropiane.
Ministrja për Çështje Evropiane, Maida Gorčević, e cilësoi këtë moment si historik, duke theksuar se Mali i Zi synon të bëhet anëtar i plotë i BE-së deri në vitin 2028.
Nga ana tjetër, Komisionerja për Zgjerim Marta Kos paralajmëroi se traktati i ri do të përfshijë mekanizma më të fortë sigurie dhe kontrolli, duke reflektuar një qasje më të kujdesshme të BE-së ndaj zgjerimit.
Megjithatë, rruga nuk ka përfunduar ende. Podgorica duhet të mbyllë të gjithë kapitujt e negociatave dhe të harmonizojë plotësisht legjislacionin me standardet evropiane. Deri tani, vendi ka përmbyllur 14 nga 33 kapitujt negociues.
Ky zhvillim shihet si një sinjal i fortë për të gjithë rajonin e Ballkanit Perëndimor, ku edhe Shqipëria mbetet ndër vendet më të avancuara në procesin e integrimit.
Pas më shumë se një dekade nga anëtarësimi i Kroacisë, Mali i Zi mund të bëhet vendi i radhës që i bashkohet BE-së – dhe ndoshta të hapë derën për një valë të re zgjerimi në rajon.
