Ministri i Mbrojtjes i Kosovës, Ejup Maqedonci, është takuar me presidentin e Turqisë, Recep Tayyip Erdoğan, gjatë ceremonisë së diplomimit të kadetëve të Akademisë Ushtarake të Forcave të Armatosura të Turqisë.
Në ceremoninë e zhvilluar në kuadër të Ditës së Fitores së Republikës së Turqisë, diplomuan edhe pesë kadetë nga Kosova, të cilët përfunduan me sukses studimet e tyre ushtarake në këtë akademi.
Maqedonci tha se gjatë ceremonisë pati rastin të takojë presidentin Erdoğan dhe ministrin e Mbrojtjes Kombëtare të Turqisë, Yaşar Güler, të cilëve ua përcolli urimet me rastin e Ditës së Fitores.
Ai veçanërisht përgëzoi pesë kadetët nga Kosova për përkushtimin, disiplinën dhe suksesin e arritur gjatë studimeve, duke u uruar karrierë të suksesshme në shërbim të vendit.
Maqedonci theksoi se bashkëpunimi Kosovë–Turqi në fushën e mbrojtjes është i rëndësishëm, ndërsa edukimi dhe përgatitja e kuadrove të reja ushtarake në institucionet turke përbën një prej shembujve konkretë të këtij bashkëpunimi.
Takimi me Erdoğan dhe diplomimi i kadetëve nga Kosova vijnë në kuadër të bashkëpunimit të vazhdueshëm ndërmjet dy vendeve në fushën e mbrojtjes dhe edukimit ushtarak.
