Ish-kryeministri italian Mario Draghi ka lëshuar një paralajmërim të fortë për të ardhmen e Evropës, duke deklaruar se kontinenti po hyn në një epokë të re ku mbështetja amerikane për sigurinë evropiane nuk mund të konsiderohet më e garantuar.
Gjatë ceremonisë së ndarjes së Çmimit “Karli i Madh” në Aachen të Gjermanisë, Draghi tha se Bashkimi Evropian përballet me një realitet të ri gjeopolitik dhe duhet të ndërtojë kapacitete të pavarura për mbrojtjen dhe sigurinë.
“Për herë të parë që nga viti 1949 ekziston mundësia që SHBA të mos mund të garantojë më sigurinë tonë në kushtet që i kemi marrë si të mirëqena për dekada”, theksoi Draghi.
Ai kritikoi ndryshimin e qasjes amerikane ndaj Evropës, duke e cilësuar SHBA-në si një partner më të paparashikueshëm dhe më konfliktual se në të kaluarën.
Sipas Draghit, Evropa duhet të reagojë me vendosmëri, jo vetëm duke forcuar kapacitetet ushtarake, por edhe duke reformuar mënyrën e funksionimit të Bashkimit Evropian, i cili sipas tij shpesh lëviz shumë ngadalë përballë krizave globale.
Ish-presidenti i Bankës Qendrore Evropiane kërkoi një qasje më pragmatike, ku vendet që kanë vullnet politik të ecin më shpejt drejt integrimit më të thellë në fushat strategjike, sidomos në mbrojtje dhe industri.
Ai paralajmëroi gjithashtu se Evropa ka mbetur pas SHBA-së në sektorin e teknologjisë dhe mbrojtjes, duke theksuar se kërkimi shkencor evropian në mbrojtje është vetëm një pjesë e vogël krahasuar me atë amerikan.
Draghi mbështeti fuqishëm konceptin “Made in Europe”, duke kërkuar investime më të mëdha në industri strategjike si mbrojtja, gjysmëpërçuesit dhe teknologjitë e pastra.
“Një Evropë që mund të mbrojë veten do të jetë edhe një aleat më i fortë për NATO-n,” deklaroi ai.
Mesazhi i Draghit vjen në një kohë tensionesh globale, pasigurie mbi rolin afatgjatë të SHBA-së në sigurinë evropiane dhe debatit në rritje për autonominë strategjike të Bashkimit Evropian.
