Një zjarr i rëndë ka përfshirë mbrëmjen e së martës një shtëpi të pleqve në qytetin e Tuzlës, ku sipas të dhënave të konfirmuara nga autoritetet, nëntë persona kanë humbur jetën, ndërsa disa të tjerë janë lënduar.
Sipas raportimeve nga Ministria e Punëve të Brendshme e Kantonit të Tuzlës, zjarri shpërtheu rreth orës 20:45 në njërin prej kateve të objektit, ndërsa ekipet e zjarrfikësve dhe emergjencës u dërguan menjëherë në vendngjarje për ta lokalizuar flakën dhe për të evakuuar banorët.
“Për të ndihmuar në evakuimin dhe shuarjen e zjarrit, janë angazhuar njësi profesionale të zjarrfikësve nga Srebreniku, Živinica, Kalesija dhe Lukavaci. Disa ekipe ndodhen tashmë në terren, ndërsa të tjerat janë në gatishmëri. Edhe shërbimet mjekësore të urgjencës nga këto komuna janë përfshirë në operacion,” – thuhet në njoftimin e MPB-së së Kantonit të Tuzlës.
Ekipet mjekësore po ofrojnë kujdes emergjent për të lënduarit, ndërsa autoritetet paralajmërojnë se numri i viktimave mund të mos jetë përfundimtar, pasi operacionet e kërkimit dhe evakuimit po vazhdojnë.
Policia kantonale është gjithashtu në vendngjarje dhe ka nisur hetimet paraprake për të përcaktuar shkakun e zjarrit, sapo ai të jetë plotësisht i lokalizuar.
Sipas dëshmitarëve, flakët janë përhapur me shpejtësi, ndërsa disa prej të moshuarve janë shpëtuar nga ekipet e emergjencës përmes dritareve.
Autoritetet lokale kanë shpallur gjendje emergjente, ndërsa hetimet pritet të zbardhin në orët në vijim nëse janë respektuar standardet e sigurisë në objektin e kujdesit për të moshuar.
