Deputeti i PDK-së, Mërgim Lushtaku, ka reaguar ashpër ndaj ushtrueses së detyrës së presidentes, Albulena Haxhiu, pas deklaratave të saj për Sami Lushtakun, duke rikthyer në vëmendje ngjarje të kaluara politike.
Përmes një postimi publik, Lushtaku ngriti pyetje lidhur me incidentin e vitit 2016 në Kuvendin e Kosovës, kur deputetë të Vetëvendosjes përdorën gaz lotsjellës.
“Kam vetëm një pyetje për të: në çfarë forme e futi gazin lotsjellës në Kuvendin e Kosovës në vitin 2016? Qytetarët meritojnë ta dinë se si u organizua ai akt që e turpëroi institucionin më të lartë të shtetit”, ka shkruar ai.
Lushtaku ka përmendur edhe bashkëshortin e Haxhiut, Alban Krasniqi, duke e akuzuar për nxitje të gjuhës së urrejtjes dhe përçarje politike.
Në reagimin e tij, ai rikujtoi edhe ngjarjen tragjike të janarit 2011, duke pretenduar për përfshirje të personave nga familja e Krasniqit në rastin e vrasjes së Skender Limajt dhe plagosjes së Azem Limajt dhe Ilir Limajt.
“Kur njerëz me një të kaluar të tillë tentojnë të paraqiten si moralizues, kjo është shqetësuese”, u shpreh Lushtaku.
Ai e përmbylli reagimin me thirrje për qetësi dhe gjuhë bashkimi në skenën politike të Kosovës, duke kundërshtuar, sipas tij, urrejtjen dhe standardet e dyfishta.
