Kancelari gjerman Friedrich Merz i ka bërë thirrje presidentit amerikan Donald Trump që të mos i vendosë aleatët europianë përpara surprizave gjatë bisedimeve të pritshme me presidentin rus Vladimir Putin për luftën në Ukrainë, të cilat pritet të zhvillohen javën e ardhshme në Kinë.
Gjatë qëndrimit në Dublin, Merz shprehu shqetësimin se mund të përsëritet skenari i takimit të mëparshëm mes Trumpit dhe Putinit në Alaskë, të cilin udhëheqësit europianë e kishin konsideruar si një moment me rëndësi të veçantë për përpjekjet drejt përfundimit të luftës në Ukrainë.
“Disa këtu në Dublin kanë frikë se mund të përsëritet skenari i Anchorage. Prandaj dua t’ia përcjell shumë qartë mesazhin tonë Shteteve të Bashkuara të Amerikës: Ju lutem, pa surpriza. Vazhdoni të veproni si pjesë e ekipit të Europës dhe ekipit të Ukrainës”, deklaroi kancelari gjerman.
Merz po përpiqet gjithashtu të sigurojë vazhdimin e mbështetjes së Bashkimit Europian për Ukrainën, në kuadër të negociatave për buxhetin afatgjatë të unionit. Ai tha se propozimi i tij ka marrë mbështetje të gjerë, por pranoi se palët janë ende larg arritjes së një marrëveshjeje.
Pas takimeve të kësaj jave mes përfaqësuesve amerikanë dhe rusë në Abu Dhabi, Merz pret që gjatë javëve të ardhshme të nisin negociatat thelbësore për paqen, në të cilat, sipas tij, duhet të përfshihen për herë të parë edhe përfaqësuesit europianë.
Kancelari gjerman kundërshtoi kërkesat e Rusisë që arkitektura e sigurisë europiane të vendoset në qendër të negociatave, duke argumentuar se një strukturë e tillë ekziston tashmë në formën e NATO-s.
“Bisedimet e ardhshme duhet të përqendrohen në një çështje thelbësore: në çfarë kuadri mund të garantohet siguria e Ukrainës pas arritjes së paqes? Por së pari duhet ta arrijmë atë paqe”, përfundoi Merz.