Një gjykatë në shtetin amerikan të Nju Meksikos ka urdhëruar kompaninë Meta të paguajë edhe 567 milionë dollarë dëmshpërblim, duke konstatuar se nuk ka paralajmëruar në mënyrë të mjaftueshme publikun për rreziqet që platformat e saj paraqesin për fëmijët.
Vendimi, i marrë nga gjyqtari Bryan Biedscheid, e rrit në 942 milionë dollarë shumën totale që Meta duhet të paguajë në këtë proces gjyqësor, pasi më herët ishte urdhëruar të paguante edhe 375 milionë dollarë. Ky konsiderohet vendimi financiar më i madh ndaj kompanisë në një çështje që lidhet me mbrojtjen e fëmijëve në internet.
Në arsyetimin e tij, gjyqtari e përshkroi Metën si një “shqetësim publik”, duke e krahasuar me ndotjen e ajrit.
Sipas tij, modeli i biznesit të kompanisë funksionon si një fabrikë ku reklamat dhe përmbajtja përbëjnë produktin, ndërsa dëmet psikologjike dhe rreziku i shfrytëzimit seksual të fëmijëve janë pasojat që duhet të parandalohen.
Gjykata urdhëroi që 567 milionë dollarët e rinj të depozitohen në një fond të posaçëm, i cili do të përdoret për masa që synojnë reduktimin e dëmeve të ardhshme ndaj fëmijëve dhe adoleshentëve.
Meta, kompania që zotëron platformat Facebook, Instagram, WhatsApp dhe Threads, reagoi duke kundërshtuar vendimin dhe njoftoi se do ta apelojë atë.
Në deklaratën e saj, kompania theksoi se investon vazhdimisht në sigurinë e përdoruesve dhe në identifikimin e përmbajtjeve të dëmshme.
“Ne punojmë çdo ditë për t’i mbajtur njerëzit të sigurt në platformat tona dhe kemi qenë transparentë për sfidat që lidhen me identifikimin dhe largimin e aktorëve keqdashës dhe përmbajtjeve të dëmshme. Jemi të bindur në punën që kemi bërë për mbrojtjen e adoleshentëve në internet dhe do të vazhdojmë të mbrohemi ndaj pretendimeve që shtrembërojnë faktet”, thuhet në reagimin e Metës.
Çështja është pjesë e një serie procesesh ligjore në SHBA që synojnë të rrisin përgjegjësinë e kompanive të teknologjisë për ndikimin e rrjeteve sociale në shëndetin mendor dhe sigurinë e të miturve.
