Zëvendëskryeministri i Maqedonisë së Veriut, Izet Mexhiti, ka deklaruar se fletëarrestet e Serbisë për ish-ushtarët e UÇK-së nuk do të zbatohet më nga policia kufitare e Maqedonisë. Sipas tij, qeveria maqedonase ka arritur një marrëveshje politike që shumë shpejt do të miratohet një zgjidhje ligjore për lëvizjen e lirë të ish-ushtarëve të UÇK-së në kufijtë e Maqedonisë.
Për shkak të mosanëtarësimit të Kosovës në Interpol, Serbia ka lëshuar vazhdimisht fletëarreste për ish-ushtarët e UÇK-së, duke i akuzuar për krime lufte. Një rast i tillë ka ndodhur në korrik të vitit 2024, kur ish-ushtari Blerim Ramdani u arrestua në pikën kufitare të Jazhincës.
Mexhiti theksoi se marrëveshja politike që është arritur në qeverinë maqedonase do të mundësojë që ish-ushtarët e UÇK-së të lëvizin lirshëm, në përputhje me modelet e vendeve të tjera europiane si Kroacia dhe Sllovenia. Kjo është pjesë e një zgjidhjeje sistemore dhe ligjore që do të zbatohet së shpejti.
Në intervistën e tij për KosovaPress, Mexhiti gjithashtu komentoi për avancimin e statusit të gjuhës shqipe në Maqedoninë e Veriut, si dhe për zhvillimet e tjera politike dhe ekonomike, duke theksuar se Maqedonia dhe Kosova janë partnerë të ngushtë dhe se bashkëpunimi mes dy vendeve po thellohet vazhdimisht.
Po ashtu, Mexhiti foli për përparimin e shqiptarëve në institucionet shtetërore dhe ushtarake të Maqedonisë, duke shtuar se për herë të parë ka një avancim të dukshëm të tyre në pozita kyçe. Ai gjithashtu theksoi se në qeverinë aktuale janë emëruar gjeneralë shqiptarë, duke përfshirë një profesionist që ka kaluar trajnime të NATO-s.
Marrëveshjet e ardhshme për ndihmën e përbashkët të dy qeverive për lehtësimin e lëvizjes dhe zhvillimin e infrastrukturës do të përfshijnë ndërtimin e një tuneli mbi gjashtë kilometra dhe implementimin e modelit “One Stop Shop” në kufijtë e Maqedonisë dhe Kosovës, shkruan Ina Online.
