Ministria e Mbrojtjes ka hapur konkurs për rekrutimin e personelit profesional, teknik dhe mbështetës për Kompleksin e Prodhimit të Municioneve në Jahoc të Gjakovës.
Lajmin e ka bërë të ditur ministri i Mbrojtjes, Ejup Maqedonci, përmes një njoftimi publik.
Sipas njoftimit, konkursi përfshin pozita në disa fusha, ndër to inxhinieri, teknikë, prodhim, mirëmbajtje, kontroll të cilësisë, siguri dhe logjistikë, si dhe profile të tjera të nevojshme për funksionimin e kompleksit.
Ministria ka bërë të ditur se përzgjedhja e kandidatëve do të zhvillohet në përputhje me legjislacionin në fuqi dhe mbi parimet e transparencës, meritokracisë dhe profesionalizmit.
Kandidatët e përzgjedhur do t’i nënshtrohen trajnimeve të nevojshme profesionale para fillimit të angazhimit në detyrë.
Hap i rëndësishëm për industrinë vendore të mbrojtjes
Sipas ministrit Maqedonci, hapja e konkursit përbën një hap të rëndësishëm drejt funksionalizimit të fabrikës së municioneve dhe zhvillimit të kapaciteteve vendore në industrinë e mbrojtjes.
Ministria u ka bërë thirrje të gjithë personave që plotësojnë kriteret e përcaktuara që të aplikojnë për pozitat e hapura.
Afati i aplikimit është nga 24 deri më 30 gusht 2026.
Aplikimi bëhet online përmes portalit zyrtar të konkurseve të Republikës së Kosovës: konkursi.rks-gov.net
