Ministria e Infrastrukturës dhe Transportit ka njoftuar se gjatë ditës së sotme do të zbatohen kufizime të përkohshme në qarkullimin e automjeteve të transportit të mallrave me masë totale mbi 20 tonë, për shkak të temperaturave të larta të parashikuara.
Sipas ministrisë, kufizimi do të vlejë vetëm në autoudhë, në intervalin kohor nga ora 11:00 deri në 17:30, pasi temperaturat pritet të arrijnë ose të tejkalojnë 32°C.
Ndërkaq, në rrugët nacionale, rajonale dhe lidhëse, qarkullimi i automjeteve të rënda do të lejohet pa kufizime.
Nga ky vendim përjashtohen automjetet e organeve të rendit dhe sigurisë publike, shërbimeve emergjente, si dhe institucionet shëndetësore.
Ministria u ka bërë thirrje operatorëve ekonomikë dhe drejtuesve të automjeteve të respektojnë kufizimet e vendosura dhe të planifikojnë lëvizjen e tyre në përputhje me orarin e përcaktuar, me qëllim ruajtjen e infrastrukturës rrugore dhe garantimin e sigurisë në trafik.
