Fundjava sjell mot të ngrohtë dhe kryesisht me diell në të gjithë vendin, me temperatura që shënojnë rritje të ndjeshme dhe arrijnë deri në 28°C, sipas parashikimeve nga Instituti Hidrometeorologjik.
E shtunë me mot të kthjellët dhe temperatura në rritje
Dita e shtunë karakterizohet nga mot shumë i ngrohtë dhe me diell. Në orët e ditës do të ketë vranësira të pakta lokale dhe kalimtare, por pa kushte për reshje. Era do të fryjë nga drejtimi jugperëndimor me shpejtësi të lehtë deri mesatare, 3-7 m/s, ndërsa në pjesë të Dukagjinit mund të arrijë deri në 12 m/s.
Temperaturat maksimale pritet të rriten ndjeshëm, duke lëvizur mes 26°C dhe 28°C, ndërsa ato minimale do të zbresin në 8°C deri 10°C.
E diel me më shumë vranësira, por moti mbetet i ngrohtë
Të dielën vranësirat do të jenë më të shpeshta mbi territorin e vendit, megjithatë moti mbetet i ngrohtë, me temperatura maksimale që qëndrojnë sërish mes 25°C dhe 28°C.
Ndryshim i kushteve nga e hëna – rikthehen reshjet
Nga dita e hënë pritet shtim i vranësirave dhe paraqitje e mundësisë për rrebeshe shiu, veçanërisht në zonat qendrore dhe perëndimore. Rrebeshet do të jenë më të përhapura gjatë ditës së mërkurë. Temperaturat do të pësojnë rënie, me maksimale që pritet të zbresin në 20°C deri 23°C.
Era do të vijojë të fryjë nga jugperëndimi me intensitet të lehtë dhe mesatar (5-10 m/s), ndërsa të martën mund të arrijë deri në 15 m/s në disa zona.
