Xavi Hernandez shihet si kandidati kryesor për të marrë drejtimin e Tottenham Hotspur sezonin e ardhshëm, teksa trajneri aktual Ange Postecoglou pritet të largohet pas përfundimit të këtij edicioni. Burime pranë klubit londinez bëjnë të ditur se sezoni aktual konsiderohet i dështuar, pavarësisht se Tottenham është ende në garë për një trofe europian.
Skuadra angleze ka siguruar një rezultat të rëndësishëm në gjysmëfinalen e parë të Ligës së Europës, duke mposhtur norvegjezët e Bodo/Glimt me rezultatin 3-1. Finalja mbetet shpresa e vetme për të shpëtuar sezonin, megjithatë, fati i Postecoglou duket se është vendosur: edhe në rast triumfi në kompeticionin europian, ai do të largohet.
Në këtë kontekst, emri i Xavit është në krye të listës së drejtuesve të Tottenham për të marrë frenat e skuadrës. Trajneri spanjoll është i lirë që prej largimit nga Barcelona në fund të sezonit të kaluar dhe nuk ka marrë ende një vendim për të ardhmen, ndonëse është lidhur me disa klube në muajt e fundit.
Nëse bisedimet përparojnë, Tottenham mund të bëhet aventura e radhës në karrierën e trajnerit 44-vjeçar.
