Trajneri i kombëtares së futbollit të Rumanisë, Ionut Badea, ka shpërthyer në zemërim pas humbjes 1:0 ndaj Bosnjë-Hercegovinës në kuadër të kualifikimeve për Botërorin 2026. Ndeshja e zhvilluar të mërkurën la një shije të hidhur te ekipi rumun, ndërsa vendimet e gjyqtarit holandez, Danny Maciele, u kritikuan ashpër nga trajneri i Rumanisë.
Në një intervistë për Digi Sport, Badea i drejtoi kritika të forta gjyqtarit për sjelljen e tij në fushë, duke e quajtur një “grabitje” vendimin që ndodhi gjatë ndeshjes. Ai shprehu zemërim të thellë për sjelljen e gjyqtarit dhe bëri një koment të papritur për stilin e tij të jetesës.
“Nuk kam folur më parë për këtë, por ndjej zemërim të vërtetë ndaj këtij gjyqtari për shkak të veprimeve të tij narcisiste. Më duket si metroseksual,” tha Badea, duke vazhduar me kritikat: “Të jesh metroseksual do të thotë të jesh tepër i kuruar. Nuk e di çfarë xheli përdor ai apo produktesh të tjera kujdesi, nuk po them që është keq, por prirja e tij narcisiste e detyroi të kalonte veten në një mënyrë negative.”
Badea e theksoi gjithashtu frustrimin e tij me vendimin për penalltinë dhe trajtimin që gjyqtari u bëri lojtarëve të tij. “Isha i indinjuar nga situata e penalltisë dhe fakti që ai nuk i lejoi lojtarët tanë të kishin fjalën për vendimet që merrte në fushë. Ai i trajtoi lojtarët tanë tmerrësisht,” shtoi trajneri i Rumanisë.
Gjyqtari Danny Maciele është një gjyqtar me përvojë, i cili ka qenë pjesë e FIFA-s që nga viti 2011 dhe gjithashtu punon si inspektor policie në Roterdam. Nga ana tjetër, Ionut Badea, që nuk është një emër i njohur ndërkombëtarisht, aktualisht është drejtor teknik i klubit Dinamo në Rumani, pas një karriere si trajner te klube të ndryshme në vend.
Kujtojmë se Bosnja dhe Hercegovina arriti të mundë Rumaninë me rezultatin 1:0 në këtë ndeshje të raundit të parë të kualifikimeve për Botërorin 2026. Për Rumaninë, shpresa për pikët e para do të mbeten në ndeshjen kundër San Marinos, ndërsa Bosnja dhe Hercegovina do të përballet me Qipron.
