Shefja e Grupit Parlamentar të Lëvizja Vetëvendosje, Arbërie Nagavci, ka bërë të ditur se partia e saj i kishte ofruar Vjosa Osmani nënshkrimet e nevojshme për kandidimin për presidente, por sipas saj, kjo ofertë është refuzuar nga presidentja aktuale.
Në një konferencë për media, Nagavci tha se përkundër këtij refuzimi, Vetëvendosje mbetet e hapur për bashkëpunim me Osmanin për çështjen e zgjedhjes së presidentit.
“Jemi të gatshëm edhe për zgjedhje të reja, përkundër që ky nuk është vullneti ynë dhe në këtë situatë sigurisht se jemi të hapur për bashkëpunim edhe me zonjën Osmani”, deklaroi ajo.
Nagavci foli edhe për kandidaturën e Glauk Konjufca, të propozuar nga Vetëvendosje për postin e presidentit, duke theksuar se deri më tani nuk ka dëgjuar ndonjë parti politike që të ketë deklaruar qartë se nuk do ta mbështesë atë.
“Unë nuk kam dëgjuar nga asnjë parti që kanë deklaruar decidivisht se nuk do të ofrojnë mbështetje për z. Konjufca”, u shpreh Nagavci.
Ajo shtoi se procesi i zgjedhjes së presidentit mbetet i hapur dhe se Vetëvendosje do të vazhdojë përpjekjet për të arritur një zgjidhje politike në Kuvend.
